VOV4.K’ho - Mho òr (10/03), tàm hìu lơh broă Đảng dà lơgar, tềng đăp mờ broă đơng lam bơh Tổng Ƀí thư ồng Nguyễn Phú Trọng, ală kwang bàng đơng lam tờm mờ kwang bàng Thường trực Ƀan Ƀí thư neh pơrjum, sền wơl ală broă geh pơnrơ ngan bơh dà lơgar, bơta tàm dunia tàm 2 nhai bồ nam 2022 mờ kơnòl tờm tàm tơngai tus.

Ală kwang bàng đơng lam tờm đơs, tàm tơngai tus, lơgar he di gơlan pơn jăt tai gơtìp mờ uă kal ke, tơlòng pa gơlik geh, tàm hơ̆ uă ngan là bơta tam lơh phào crong tàm lơgar Ukraine; bơta kal ke khà priă gơmù, khà priă phan lơh broă, khà priă xăng jờu gơguh uă; bơta kòp gơtờp gam gơtìp kal ke. Jơnau đơs pơn dŭt pơrjum, Tổng Ƀí thư ồng Nguyễn Phú Trọng sồr, ală kấp, ală gah lơh broă pơn jăt tai pơgồp bal niam, di pal, đơng lam lơh jăt ală kơnòl geh cồng nha. Jăt mờ hơ̆, tơrgùm lơh jăt ndrờm bal ală broă rơcang sơndră mờ kòp Kovid-19; lơh jăt ală kơnòl, broă lơh bơh broă brồ guh wơl mờ tơnguh bơtàu lơh sa mpồl bơtiàn; Sền gròi di pal bơta tàm dunia, gàr niam bơta lơngăp lơngai mờ ờ do ờ dă uă ngan bè màng kis, phan bơna, bơta kwơ di mờ adăt boh lam, di pal ai làng bol in; Pơn jăt tai đơng lam nền nòn, pràn kơl dang broă rơcang sơndră mờ sa kuề sa koà, hoàc huơr ờ niam...

Cau mblàng Ndong Brawl