Nàng cribơyai, ai jơnau đơs bè cồng nha sồr lơh bơsong gơwèt mờ bàr pe dơ̆ lơh tìs, dơ̆ broă lơh tìs gơwèt broă Mpồl đơng lam jăt sền, sồr lơh bơh tơnơ̆ pơrjum dơ̆ 21 tus tŭ do.

Đơs pơndŭt dơ̆ pơrjum, bal mờ broă jờng rơ uă ngan ală cồng nha pơnrơ mpờl gŏ loh ngan tàm broă lơh tam dră rơcăng sơndră sa kwề sa kwà, bơta ờ niam tàm tơngai lài, Tổng Ƀí thư ồng Nguyễn Phú Trọng kung sơñio loh, broă lơh tam dră rơcăng sơndră sa kwề sa kwà mờ bơta ờ niam kung gam sơl bàr pe bơta gam gơkòl, ờ hềt pràn jak, bè: Bàr pe dơ̆ lơh tìs, dơ̆ broă lơh tìs lơyài tơn jơh bơsong jăt broă rơndăp lơh bơh Mpồl đơng lam dê. Tổng Ƀí thư ồng Nguyễn Phú Trọng đơs loh nùs nhơm: Tàm tam dră rơcăng sơndră sa kwề sa kwà mờ bơta ờ niam pal lơh kràñ cê jơh nùs mờ dùl ròt bal, kràñ cê jơh nùs dùl ròt bal đah bơ̆t bơtàu mờ dră wơl, đah lơh sir gơs kơrnoăt boh lam nàng ndơl ndơ̆p ală anih ờ hềt ndơ̆p, anih ờ hềt di mờ broă lơh jăt ală broă lơh rơcăng lài kơryan sa kwề sa kwà; đah sơlơ lòt sền, jăt sền, lùp sền, sền swì kờp dŭ priă jền dơ̆ ngui nàng gŏ sa kwề sa kwà mờ bơta ờ niam bal mờ lùp khàu, yal yă, cah rña lơh jăt kơrnoăt lơh glài bơh anih cah rña dê.