VOV4.K’ho - Drim òr (08/02), tàm Hìu lơh broă Đảng dà lơgar, Tổng Ƀí thư ồng Nguyễn Phú Trọng đơng lam dơ̆ pơrjum Ƀan ƀí thư sền wơl bè broă lơh jăt Cỉ thị bơh Ƀan ƀí thư bè broă bơyai lơh satềp Ñâm Zấn nam 2022 mờ Cỉ thị bơh Thủ tướng Cíñ phủ bè broă tơnguh ală broă gàr niam wă rò satềp Ñâm Zần nam 2022 chờ hờp, niam bơnĕ, ờ do ờ dă, tềm pềr.

                               Tổng Ƀí thư ồng Nguyễn Phú Trọng geh jơnau đơng lam dơ̆ pơrjum

Ală kwang bàng đơng lam Đảng, Dà lơgar neh còp, chờ gờm satềp tàm 63 càr, ƀòn dờng, pà phan ai ală cau geh sră dong kờl bơh dà lơgar, cau lơh broă ờ rê satềp hờ ƀòn lơgar tờm; còp, chờ gờm satềp ală xã, ƀòn tàm tiah nhàr dà lơgar, pôs ling sền gàr tiah nhàr dà lơgar, ală mpồl lam lài rơcang sơndră mờ kòp Kovid-19, sền gàr lơh jăt kơnòl tàm tơngai satềp. Đơs pơn dŭt tàm pơrjum, Tổng Ƀí thư ồng Nguyễn Phú Trọng đơs loh, tơnơ̆ mờ dơ̆ ơm rơlô satềp, ală anih lơh broă, mpồl lơh broă pal tơrgùm lơh jăt mơ ală kơnòl cíñ trị, mhar ai ală broă lơh wơl bè ờs, gàr niam broă lơh dà lơgar geh bơyai lơh niam, drơng niam broă kờñ bơh làng bol; bañ lời gơtìp satềp jŏ ir, ờ sền gròi tus mờ broă lơh, lơh ờ niam tus mờ broă lơh sa, kă bro bơh làng bol bal mờ mpồl lơh sa kă bro dê.

Cau mblàng Ndong Brawl