Drim ngai 16/08/2023, tàm Hìu duh broă Đảng Dà lơgar, Tổng Ƀí thư ồng Nguyễn Phú Trọng, Kwang ătbồ Mpồl đơng lam neh đơng lam pơrjum dơ̆ 24 Mpồl đơng lam Dà lơgar bè rơcăng lài tam dră wơl sa kwề sa kwà mờ bơta ờ niam nàng cribơyai, ai jơnau đơs bè cồng nha lơh broă bơh Mpồl đơng lam dê tàm 6 nhai bồ nam 2023 mờ sền wơl broă lơh rơcăng lài tam dră wơl sa kwề sa kwà mờ bơta ờ niam bơh bồ tơngai lơh kơnòl broă Pơrjum dờng dơ̆ XIII bơh Đảng dê tus tŭ do; gĭt nền kơnòl broă tờm lơh broă tàm ală nhai lồi nam mờ tơngai tus. Lài hơ̆, tàm ngai 10/05, Duh broă sùm Mpồl đơng lam Dà lơgar bè rơcăng lài tam dră wơl sa kwề sa kwà mờ bơta ờ niam, hòi lơyah là Mpồl đơng lam bơyai lơh dơ̆ pơrjum bơh bơta đơng lam bơh Tổng Ƀí thư ồng Nguyễn Phú Trọng dê.

Tàm dơ̆ pơrjum do, Duh broă sùm Mpồl đơng lam sồr ală kâp ủy, mpồl đảng, anih lơh broă geh gơnoar pơn jăt tai lơh pràn broă lơh tam dră rơcăng lài tam dră wơl sa kwề sa kwà mờ bơta ờ niam bal mờ nùs nhơm “kràn cê jơh nùs, kơ̆ dơn, ờ rlô, ờ ơm, ờ geh tiah ờ ai, ờ geh ơm bơdìh, khăt bulah cau hơ̆ là cau lơi”, lam lơh jăt geh cồng nha ală kơnòl broă rơcăng lài tam dră wơl sa kwề sa kwà mờ bơta ờ niam jăt Jơnau đơs pơndŭt pơrjum dơ̆ 23 bơh Tổng Ƀí thư, Kwang ătbồ Mpồl đơng lam dê mờ Broă lơh lơh broă nam 2023 bơh Mpồl đơng lam dê.