Drim òr (29/11), tàm hìu lơh broă Đảng dà lơgar, Ƀộ Cíñ trị, Ƀan Ƀí thư bơyai lơh pơrjum gùt lơgar geh lơh tơn mờ pờ tơlik tàm internet lơh jăt Nghị quyết sồ 30 bơh Ƀộ Cíñ trị khoă 13 bè gùng dà broă tơnguh bơtàu lơh sa mpồl bơtiàn, gàr niam broă rơcang sền gàr bơta lơngăp lơngai dà lơgar tàm tiah ring dà dờng Hồng tus nam 2030 mờ gùng dà broă lơh tus nam 2045.

Tổng Ƀí thư ồng Nguyễn Phú Trọng đơng lam mờ geh jơnau đơng lam kwơ màng tàm pơrjum. Do là pơrjum lơh gơs broă ai ngui mờ bơyai lơh jăt ală Nghị quyết bơh Ƀộ Cíñ trị khoă 13 gơwèt mờ jơh 6 tiah lơh sa mpồl bơtiàn gùt lơgar dê. Tiah ring dà dờng Hồng geh 11 càr, ƀòn dờng. Tàm rài bơ̆t bơtàu mờ sền gàr dà lơgar lài do bơh dà lơgar he dê, do sùm là tiah tờm bơh tiah Càr lơgar, geh kwơ màng ngan bơh gùt lơgar dê bè cíñ trị, lơh sa, bơta chài rơgơi, mpồl bơtiàn, sền gàr bơta lơngăp lơngai dà lơgar mờ lơh broă bal mờ lơgar ndai. Nghị quyết pa geh pơgồp bal bơnah broă tàm broă ai geh bơta tam gơl pràn kơl dang, geh bơta sơbăc mhar tàm dơ̆ tam gơl pa, tơnguh bơtàu lơh sa mpồl bơtiàn, gàr niam bơta lơngăp lơngai dà lơgar tàm tiah ring dà dờng Hồng mờ gùt lơgar tàm tơngai tơnguh bơtàu pa.