VOV4.K’ho- Drim ngai 15/4, tềng đap bơta đơng lam bơh Tổng Ƀí thư ồng Nguyễn Phú Trọng dê, Ƀộ Cíñ trị, Ƀan Ƀí thư bơyai lơh pơrjum gùt lơgar bơto pơlam mờ lơh jat Nghị quyết sồ 11 bơh Ƀộ Cíñ trị dê bè gùng dà bơtàu tơnguh lơh sa mpồl bơtiàn, sền gàr dà lơgar, sền gàr lơngap lơngai tiah dòr bơnơm mờ tiah kơh bơnơm đah tô dà lơgar tus nam 2030, broă wèt sền tus nam 2045.

Mblàng lơh loh bè broă pal lơh mờ lơh bè lơi nàng lam lơh jat geh cồng nha nghị quyết bơh Ƀộ Cíñ trị dê dơ̆ do, Tổng Ƀí thư ồng Nguyễn Phú Trọng đơs nền 5 broă gơ wèt tus mờ 14 càr tàm tiah do mờ gơ wèt mờ ală Ƀộ, gah broă lơh dà lơgar, tàm hơ̆ pal bơto pơlam dùl bă tơl làm, di ngan mờ jrô ơnàng bơta kuơ, jơnau kờñ, jơnau sồr, tơngume bơh Nghị quyết dê, git kơ̆ ală nùs nhơm, jơnau đơs đơng lam, ală broă pal lơh. Lơh gơlik bơta ring bal uă tàm jơnau git wă tàm jơh ală kâp, ală gah broă lơh, bơh làng bol mờ ală mpồl lơh sa kă bro dê bè gơnoar broă, bơngă mờ bơta kuơmàng bơh tiah do dê. Nùs nhơm là pal git wă mờ bơsong gơ in di, gơ in niam bơta tàm gơ rềng đah bơtàu tơnguh tiah do mờ bơtàu tơnguh bal gùt lơgar dê. Do kung là broă lơh dờng màng mờ pal geh ngan, ai tơnggŏ kơnòl bơh jơh gùt Đảng mờ gùt lơgar dê gơ wèt tus mờ làng bol ală jơi bơtiàn kòn cau tiah dòr bơnơm tiah kơh bơnơm đah tô dà lơgar.

Cau mblàng K’Duẩn