VOV4.K’ho - Drim òr (22/04), Ƀộ Cíñ trị, Ƀan Ƀí thư bơyai lơh pơrjum gùt lơgar tơn pơgồp bal mờ pờ tơlik tàm internet lơh jăt Nghị quyết sồ 13 bơh Ƀộ Cíñ trị khoă 13 bè tơnguh bơtàu lơh sa mpồl bơtiàn mờ sền gàr dà lơgar bal mờ bơta lơngăp lơngai tàm tiah ring dà dờng Cửu Long.

                              Tổng Ƀí thư ồng Nguyễn Phú Trọng geh jơnau đơs tàm pơrjum

Đơs tàm dơ̆ pơrjum, Tổng Ƀí thư ồng Nguyễn Phú Trọng neh mblàng 3 tơngu me tờm nàng mblàng bè broă Ƀộ Cíñ trị tơlik Nghị quyết pa bè tiah ring dà dờng Cửu Long. Tàm hơ̆ geh tơngu me pa ngan tàm Nghị quyết 13, hơ̆ là neh gŏ loh tơngu me tơrgùm bal mờ ờ uă jơnau kờñ mùl màl lơh ngan tus nam 2030 là: “Tiah ring dà dờng Cửu Long là tiah sinh thái, gơguh jăk mờ kơl jăp, geh uă bơta niam chài rơgơi dà dờng: là tiah tờm lơh sa suơn sre kơl jăp, pràn mờ geh cồng nha uă dà lơgar, tiah do mờ dunia dê”... Tổng Ƀí thư ồng Nguyễn Phú Trọng sồr tơnkah 5 broă pal geh lơh tàm tơngai tus, sồr, Ƀan kwang bàng Đảng, Cíñ phủ mhar bơ̆t bơtàu, tơlik broă lơh jăt Nghị quyết, jào kơnòl mùl màl ai ală ƀộ, gah lơh broă tàm Dà lơgar mờ ală tiah tàm do dê.

Cau mblàng Ndong Brawl