Ngai 23/10, tàm Hìu lơh broă Đảng dà lơgar, Ƀộ Cíñ trị, Ƀan Ƀí thư bơyai lơh pơrjum gùt lơgar jat broă lơh pơrjum tơn pơgồp bal mờ pờ tơlik tàm internet bơto bơtê mờ pơlam lơh jat Nghị quyết sồ 24 bơh Ƀộ Cíñ trị khoă 13 dê bè bơtàu tơnguh lơh sa - mpồl bơtiàn, sền gàr dà lơgar, sền gàr lơngăp lơngai tàm tiah đah jum mat tơngai lik dà lơgar tus nam 2030, broă wèt sền tus nam 2045. Tổng Ƀí thư ồng Nguyễn Phú Trọng đơng lam mờ geh jơnau đơs đơng lam kuơmàng tàm pơrjum. Tiah đah jum mat tơngai lik dà lơgar geh ƀòn dờng Hồ Chí Minh mờ 5 càr gơwèt dà lơgar là: Tây Ninh, Bình Phước, Bình Dương, Đồng Nai, Bà Rịa - Vũng Tàu. Là tiah geh ù tiah, gơnoar broă dờng màng ngan tàm bơtàu tơnguh lơh sa - mpồl bơtiàn, sền gàr dà lơgar, sền gàr lơngăp lơngai mờ cribơyai broă mờ lơgar ndai bơh dà lơgar dê.

Gùt anih pơrjum

Đơs đơng lam tàm dơ̆ pơrjum, Tổng Ƀí thư ồng Nguyễn Phú Trọng pin dờn là: Kâp ủy, gơnoar atbồ mờ làng bol ală càr tàm tiah đah jum tơngai lik dà lơgar ngan là geh ngui niam, ngui pràn rlau tai mờng chài tam gơl pa, bơhiàn ờs mờng kac màng, khin cha jak chài pơn iờ să mờ nùs nhơm dờng màng, niam bơnĕ, rơcang lài, bơceh pa, bềng lìu nùs nhơm niam bơh cau tiah đah mat tơngai lik dà lơgar dê; bal mờ ală ƀan, ƀộ, gah lơh broă dà lơgar mờ kâp ủy, gơnoar atbồ ală kâp tàm gùt lơgar, lơh ngan pơn đơl pràn rlau tai, lơh ngan lơh jat geh cồng nha Nghị quyết bơh Ƀộ Cíñ trị dê dơ̆ do, lơh gơlik bơta tam gơl pa, cèng bơta brồ guh tàm broă bơtàu tơnguh lơh sa mpồl bơtiàn mờ sền gàr dà lơgar, sền gàr lơngăp lơngai tàm tiah đah jum tơngai lik dà lơgar.