Tổng Ƀí thư ồng Nguyễn Phú Trọng tus bal mờ đơs tàm dơ̆ jàu gai lòng. Jơh nùs jàu Gai lòng 60 sơnam Đảng mờ pà bơkào gờm chờ ồng Nông Đức Mạnh- Tổng Ƀí thư lài do in, Tổng Ƀí thư ồng Nguyễn Phú Trọng đơs nền, ồng Nông Đức Mạnh là kwang bàng jơi bơtiàn kòn cau, deh mờ dờng bơh tiah ƀòn lơgar tiah kơh bơnơm đah Tô dà lơgar bềng bơhiàn kờñ gơboh dà lơgar, kăc màng, neh at uă gơnoar broă lơh broă bơh kấp hơđơm tus Ƀí thư Tỉñ ủy, Củ tịc Quôk hội khoă IX, khoă X mờ Tổng Ƀí thư Ƀan Cấp hàñ Đảng Dà lơgar khoă IX (tơngai lơh broă bơh nam 2001- 2006), khoă X (tơngai lơh broă bơh nam 2006- 2011).

Bulah ơm tàm gơnoar broă lơi, ồng Nông Đức Mạnh kung sùm sùm jơh nùs jơh tồr dùl nùs dòn song mờ Đảng, mờ Dà lơgar mờ làng bol; kơ̆ nùs mờ jơnau kờñ, bồ tơngoh bơh Đảng, sùm bơsram, bơto pơlam, pơlam tàp, pơnđơl pràn lơh ngan lơh sir niam ngan tơl kơnòl broă geh jàu.