Là cau lam bồ Cíñ phủ, Thủ tướng Cíñ phủ ồng Phạm Minh Chính ngoh rơngăc đơs, ồng chờ hờp pơn yờ să ngan mờ geh bơta hờn chờ dờng tŭ geh lơh broă mờ Tổng Ƀí thư ồng Nguyễn Phú Trọng tàm sùm 8 nam mờ mờr 8 nhai, tàm ală gơnoar broă krơi is; bơh Kwang bàng Ƀộ Cíñ trị, Ƀan Ƀí thư, Kwang atbồ Rơndăp broă Dà lơgar, Kwang atbồ sền gàr, dong kờl pràn kơl dang să jan kwang bàng Dà lơgar tus Thủ tướng Cíñ phủ dê.

Thủ tướng Cíñ phủ pà git: “Añ chờ hờp pơn yờ să ngan mờ geh bơta hờn chờ dờng geh lơh broă mờ Tổng Ƀí thư ồng Nguyễn Phú Trọng, bơh tŭ lơh broă mờ bơta dong kờl, ai geh ală bơta sền gròi bơh ồng dê añ gŏ geh ală broă pơn rơ ngan bè do. Dơ̆ 1, ồng là dùl kwang đơng lam bồ is ồn jak chài ngan tài jơnau kờñ bơt bơtàu dùl Dà lơgar dờng pràn, pas gơs mờ làng bol geh kis hờn chờ hờm ram mờ geh bơngă pin dờn dờng ờ mìng tàm lơgar, tàm tiah do lơm, mờ gam jơh bal tàm dunia”.

Tŭ gam kis, Tổng Ƀí thư ồng Nguyễn Phú Trọng sền gròi uă ngan tus bơta bơtàu tơnguh bơh ƀòn dờng Hồ Chí Minh dê mờ jat jơnau đơs bơh Tổng Ƀí thư dê do “dùl ù tiah kuơmàng ngan”. Bơh tŭ at gơnoar broă cau atbồ bơh Đảng dê, Tổng Ƀí thư ồng Nguyễn Phú Trọng neh geh 15 dơ̆ lòt còp mờ lơh broă tàm ƀòn dờng cèng mat sơnđan Wa Hồ.

Dơ̆ lòt còp dut ndơl bơh Tổng Ƀí thư ồng Nguyễn Phú Trọng dê geh lơh tàm ngai 23/9/2022, di tơngkah 77 nam Ngai tiah đah jum dà lơgar tam lơh. Nàng pơgồp bơnah dipal bal mờ gùt lơgar lam lơh geh cồng nha jơnau kờñ tus nam 2030 lơgar he gơ gơs là lơgar gam bơtàu tơnguh gam broă lơh sa mờ măi mok pa, priă lơh geh kờp bal uă; tus nam 2045 lơgar he gơ gơs là lơgar bơtàu tơnguh, priă lơh geh uă; mờ nàng bal mờ ală càr, ƀòn dờng tàm tiah đah jum mat tơngai lik dà lơgar lam lơh jat geh cồng nha Jơnau lơh nền tàm porjum bơh Ƀộ Cíñ trị dê, Tổng Ƀí thư ồng Nguyễn Phú Trọng đơs nền: “Añ sồr ală oh mi tàm Mpồl duh broă Đảng ƀộ ƀòn dờng bal mờ jơh gùt anih lơh broă cíñ trị pal pơn jat tai kơlôi sơnơng, git loh jơnau bơh tài gơbàn, jơnau bơsram mờng chài mờ di tŭ geh ală broă dong kờl, broă lơh bơsong geh cồng nha. Ală broă lơi sơrlèt rlau gơnăp gơnoar den yal mờ Đảng dà lơgar, Quôk hội, Cíñ phủ sền sơ wì, lơh gơlik bơta niam nàng tă bơsong; tàm hơ̆ geh gùng dà broă lơh, broă dong kờl krơi is, broă dong kờl uă rlau pơn drờm mờ Jơnau lơh nền tàm pơrjum sồ 54 bơh Quôk hội khoă XIV dê”.

 Nam 2016, Đảng ƀộ, gơnoar atbồ mờ làng bol ală jơi bơtiàn xã Bản Bo, kơnhoàl Tam Đường, càr Lai Châu chờ hờp ngan geh wă rò Tổng Ƀí thư ồng Nguyễn Phú trọng tus còp. Lơh jat jơnau nting bơr bơh Wa dê tàm dơ̆ lòt còp nam hơ̆, kwang bàng, đảng viên mờ làng bol ală jơi bơtiàn tiah do neh tă pơgồp bal dà kơl hề, dùl nùs bal, pơnđơl pràn lơh ngan sơr lèt gan kal ke, bồ guh gơ gơs tiah àng tàm bơtàu tơnguh lơh sa, bơt bơtàu ƀòn lơgar pa tàm tiah do dê.

 Ồng Hạng A Sào, kòn cau Mông, ơm tàm ƀòn Nà Phát, xã Bản Bo, kơnhoàl Tam Đường pà gĭt: Tơnơ̆ tŭ tìp mờ geh Tổng Ƀí thư ồng Nguyễn Phú Trọng pơndờm pơnđiang, hìu bơnhă ồng neh jơh nùs rồ ù gời mờ pờ ơnàng bă ù tam cè bơh hìu bơnhă he dê: “ Wa Trọng sền gròi uă ngan tus lơh sa bơh làng bol dê. Wa tus còp suơn cè hìu añ mờ Wa pơndờm pơnđiang hìu bơnhă mờ làng bol pơn đơl pràn lơh ngan sơng ka sền gàr suơn cè nàng geh lơh sa ai hìu bơnhă in jŏ jòng. Bơh jơnau pơndờm pơnđiang bơh Tổng Ƀí thư dê, làng bol tàm ƀòn neh pơnđơl pràn lơh ngan brồ guh nàng sơng ka sền gàr mờ tơrgùm lơh sa bơh suơn cè mờ tŭ do rài kis làng bol dê neh hờm ram, hờn chờ rau”.