Geh bơsram tàp tàm rài kis kăc màng, mờ bơta sền sơnơng jrô jŏ jòng, bồ tơngoh kơlôi sơnơng jak chài ngăc ngar, gơjăt bal nền nòn đah jơnau cribơyai tàm sră pơ àr mờ ai tơrgùm bơh tàm bơta geh ngan, Tổng Ƀí thư ồng Nguyễn Phú Trọng neh đòm jăt tàm pơdờn jak chài ngan bồ tơnggoh, nùs nhơm, broă lơh mờ gùng lòt kăc màng bơh Củ tịc Hồ Chí Minh dê, bơ̆t bơtàu dà lơgar he “ờ hềt tŭ lơi geh đau phan bơna, bơta pràn, bơngă mờ gơnoar broă ală lơgar bè ngai do”.

Tàm khà ală tă pơgồp bơh Tổng Ƀí thư ồng Nguyễn Phú Trọng dê mờ pơnrơ ngan là dơ̆ rơcăng lài tam dră sa kwề sa kwà, bơta ờ niam halà broă lơh mờ lơh jăt ngan ngồn ală jơnau sồr, jơnau cih tàm Đảng dê neh pơgồp bơnah dờng ngan, bơsong ală bơta lòng, kal ke ngan rlau jơh bơh dà lơgar dê tàm tŭ tơngai bơtàu tơngguh pa.

“Broă lơh chu bơnhă ồs” neh gơgơs dồ jơnau đơs mờng kwèng ngan tàm jơnau đơs mpồl bơtiàn dê pah tŭ đơs tus broă lơh rơcăng lài tam dră sa kwề sa kwà, bơta ờ niam bơh Đảng he dê lam lơh mờ Tổng Ƀí thư ồng Nguyễn Phú Trọng să tờm tơn sồr lơh bơh tơngai lơh broă Pơrjum dờng dơ̆ XI tus tŭ do.

Phó Giáo sư, Tiến sĩ ồng Lê Văn Cường, Phó Kwang ătbồ Viện Bơ̆t bơtàu Đảng, Họk viện Cíñ trị Dà lơgar Hồ Chí Minh ờ tŭ lơi gơtùi hŭi geh dà măt bơh Tổng Ƀí thư ồng Nguyễn Phú Trọng dê tàm dơ̆ tơn jơh Pơrjum Dà lơgar 6 khoă XI, ngai 15 nhai 10 nam 2011. Hơ̆ là dà măt jê sồt bơh cau kong kơnòl cíñ trị jơnhoa ngan rlau jơh tềng đăp Đảng, tềng đăp làng bol tŭ “dồ bơnah ờ dồ êt nă kwang bàng, đảng viên” neh gơplơ̆ gơhŭc, gơtŭp tìs. Dà măt hòr hơ̆ neh gơgơs bơta pràn bơtòm tơrgùm, tam gơl gơgơs bơta lơh ngan jơh nùs bơh jơh gùt Đảng, gùt làng bol dê tàm dơ̆ tam dră sa kwề sa kwà, bơta ờ niam: Tŭ lam lơh dơ̆ tam lơh rơcăng lài tam dră sa kwề sa kwà, bơta ờ niam den Tổng Ƀí thư ồng Nguyễn Phú Trọng neh ñìm, gơhòr dà măt. Ñchi bơh tài bè hơ̆ taih? Tài bơh Tổng Ƀí thư neh đơs rao, he tam dră sa kwề sa kwà bơta ờ niam là he lơh is tàm să he, gŏ gơlơh jê ngan, ờ kờñ pal tam dră mờ oh mi, gơ̆p mpồl he dê, ờ cau lơi kờñ lơh glài. Oh mi gơ̆p mpồl he dê neh rlau lơh tìs den bol he pal kràñ cê kơ̆ nùs bơsong, ờ geh tiah kơryan, ờ geh ơm bơdìh, bulah khăt cau hơ̆ là cau lơi. Tàm do, bơta ngoh rơngăc bơh Tổng Ƀí thư dê geh bơta pràn lơh tơngkah, geh bơta pràn lơh gơrề, lơh bol he ờ dơrcul nùs, ờ rŭc jơng, mơya kung ờ gŏ geh ờ rơcăng lài, lờih lờm. Geh bè hơ̆, den hơ̆ sồng dipal mờ kơnòl broă mờ Đảng mờ Làng bol neh jàu kơnòl”.

Să tờm tơn ăt gơnoar broă “Kwang Đơng lam bồ”- Kwang ătbồ Mpồl Sồr lơh, Tổng Ƀí thư ồng Nguyễn Phú Trọng neh bal mờ làng bol mŭt tàm dơ̆ tam dră sa kwề sa kwà bal mờ nùs nhơm ờ lời nùs, ờ geh tiah kơryan, ờ geh ơm bơdìh. Mìng kờp is bơh bồ tơngai lơh broă Pơrjum dờng dơ̆ XIII tus tŭ do, Mpồl Duh broă Đảng Kộng sản Dà lơgar Việt Nam dê, Ƀộ Cíñ trị, Ƀan Ƀí thư neh lơh glài 44 mpồl đảng mờ 164 nă đảng viên, tàm hơ̆ geh 13 nă Kwang bàng Mpồl Duh broă Đảng Dà lơgar, 17 nă lài do là Kwang bàng Mpồl Duh broă Đảng Dà lơgar mờ 19 nă ling geh griăt kâp tướng tàm mpồl phàu crong; 19 nă Kwang bàng Mpồl Duh broă Đảng Dà lơgar mờ Kwang bàng Ƀộ Cíñ trị geh ai lời ăt gơnoar broă. Bơta mùl màl do bè jơnau bơh Tổng Ƀí thư ồng Nguyễn Phú Trọng dê đơs bulah “jê sồt ngan” mơya neh pơgồp bơnah lơh geh wơl nùs nhơm pin dờn bơh làng bol dê gơ wèt mờ bơta đơng lam bơh Đảng dê: Dơ̆ tam dră sa kwề sa kwà bơh Đảng he đơng lam, lam bồ là ồng Tổng Ƀí thư Nguyễn Phú Trọng geh lơh niam ngan, geh cơng tàng ngan. Bol he neh kràñ cê kơ̆ nùs, kơ̆ dơn, neh lam lơh dơ̆ tam dră sa kwề sa kwà bơta ờ niam do jrô ơnàng làm uă tàm jơh gùt làng bol. Añ dòn là, mờ gùng dà tŭ do dơ̆ tam dră bơta ờ niam tam dră sa kwề sa kwà tàm Việt Nam bơh bơta đơng lam bơh Đảng dê ờ gơtùi lơh sơlơ̆u geh wơl ờ.

Ờ mìng bơh ală broă lơh tàm mùl màl, dơ̆ tam dră sa kwề sa kwà, bơta ờ niam gam geh Tổng Ƀí thư ồng Nguyễn Phú Trọng tơrgùm cih gơs jơnau cribơyai tàm sră pơ àr bơh pang sră “Kràñ cê kơ̆ nùs, kơ̆ dơn tam dră, rơcăng lài dră wơl sa kwề sa kwà, bơta ờ niam, pơgồp bơnah bơ̆t bơtàu Đảng mờ Dà lơgar he ngai sơlơ sàng goh, pràn kơldang kơ̆ kơl jăp”. Phó Giáo sư, Tiến sĩ ồng Vũ Tình, lài do là Phó Kwang ătbồ Hìu bơsram Đại họk Khoa họk Xã hội mờ Ñân văn, Đại họk Dà lơgar ƀòn dờng Hồ Chí Minh đơs nền, pang sră là “sră bơto pơlam” ai ală cau lơh broă lơh rơcăng lài tam dră sa kwề sa kwà, bơta ờ niam in: Rơnàng kơnòm să kờñ pal gĭt wă geh he pal tề lam bơta pràn jak, bơta pràn dră wơl bơh he dê bè lơi tàm tŭ ală mpồl cau gơjrañ kwềng jòi tơl broă lơh aniai broă lơh rơcăng lài tam dră sa kwề sa kwà mờ bơta ờ niam. Bơh pang sră do, rơnàng kơnòm să rơ̆p gĭt wă loh rlau kơnòl bơh he dê gơ wèt mờ dà lơgar, gơ wèt mờ jơi bơtiàn, kờñ pal bơsram tàp, tề lam bơta pràn jak bè lơi nàng dipal là ală cau gam mờ rơ̆p là cau tờm rài tơnơ̆ do bơh dà lơgar dê.

Bơh bơta sồr lơh bơh Tổng Ƀí thư ồng Nguyễn Phú Trọng dê, broă lơh rơcăng lài, tam dră sa kwề sa kwà, bơta ờ niam geh lơh bal bal mờ broă lơh kwang bàng. Mờ jơnau kờñ gàr kràñ duh rơngòt adăt boh lam mơkung tơnggŏ nùs nhơm niam chài kòn bơnus; bơh tơngai lơh broă Pơrjum dờng dơ̆ XI tus tŭ do, Đảng he neh ai lơh jăt jơnau cih loh làng. Tàm hơ̆, broă “ai tơn lời”, “ai lời ăt” geh cih tàm Jơnau cih sồ 41 ngai 03 nhai 11 nam 2021 bơh Ƀộ Cíñ trị khoă XIII dê là dùl tàm ală tềl kah pơnrơ ngan, geh bơta tam gơl pràn tàm broă pơgồp bal kơnhăp đah bơsram, lơh jăt bồ tơnggoh, nùs nhơm, broă lơh Hồ Chí Minh dê mờ broă lơh bơ̆t bơtàu, lơh niam wơl Đảng.

Giáo sư, Tiến sĩ ồng Tạ Ngọc Tấn, lài do là Kwang bàng Đảng Dà lơgar, Phó Củ tịc duh broă sùm Mpồl duh broă cribơyai jơnau tàm sră pơ àr Dà lơgar dê đơs nền, ờ hềt tŭ lơi Đảng he geh ală sră nggal ndrờm bal mờ tơl làm gơrềng tus broă lơh kwang bàng bè tŭ do. Cồng nha hơ̆ là bơta tă pơgồp dà kơlhề bềng bơta jơh nùs jơh tồr, geh kơnòl bơh Tổng Ƀí thư ồng Nguyễn Phú Trọng dê tàm jơh mờr 3 tơngai lơh broă: Tàm ală jơnau đơs tơn jơh ală dơ̆ Pơrjum dờng dê den ală jơnau yal cíñ trị ndrờm đơs sùm bơta ờ pràn ngan rlau jơh kung gam sơl là lam lơh jăt. Mờ kờñ lam lơh jăt niam den pal geh dồ adăt boh lam sir niam. Mpồl Duh broă Đảng Dà lơgar bơh bơta đơng lam bơh Tổng Ƀí thư ồng Nguyễn Phú Trọng neh lơh sir ală jơnau cih, ală jơnau sồr, ală jơnau pal jăt tàm broă lơh Đảng dê, bơh bơta pal jăt lam lơh, gùng dà lơh broă bơh ală kâp ủy, tus dì ală mpồl lơh broă dê, bơta gơrềng đah anih lơh broă…nàng kờñ lơh sir adăt boh lam tàm broă lơh Đảng dê. Mờ tŭ bol he geh dồ adăt boh lam sir niam, dipal, ngăc ngar mờ tơl gơtùi lơh jăt den tŭ hơ̆ gơ rơ̆p geh gơnoar broă kwơmàng ngan tàm broă tơngguh tai gơnoar broă đơng lam Đảng dê, tơngguh tai cồng nha đơng lam mờ ăt gơnoar bơh Đảng dê.

Mờ ală tă pơgồp is ồn ai broă lơh kăc màng bơh Đảng dê, ờ gŏ di là đơs ir ờ, Tổng Ƀí thư ồng Nguyễn Phú Trọng là kòn bơnus geh deh nàng bơsong ală kal ke, bơta lòng tàm dồ tŭ tơngai kah yau dà lơgar dê.

Dan geh tơn jơh jơnau cih bơh ală jơnau đơs yal is ngoh rơngăc ngan bơh Tổng Ƀí thư ồng Nguyễn Phú Trọng dê tŭ gam kis. Pah tŭ kờñ đơs ala jơnau đơs tàm nùs he dê, ồng sùm đơs wơl, ai pơnyơu bàr pe jơnau đơs jrô ngan bơh ồng Paven Kốp-cha-gin tàm pang sră tiơng pơnrơ ngan “Lòs neh srong bè den” bơh cau cih jơnau lơgar Liên Xô dê ồng Nikolai Ostrovsky. Hơ̆ kung là jơnau niam mờ Tổng Ƀí thư ồng Nguyễn Phú Trọng neh ting jăt jơh dồ rài kis: Bơta kwơmàng ngan rlau jơh bơh kòn bơnus dê là rài kis bơngă kis, tài bơh rài kis kòn bơnus mìng kis geh dồ dơ̆ lơm. Pal kis bè lơi nàng ờ gơ in pơlai soh, ờ gơ in wờl să tài ală nam nhai neh kis sùm, kis pơhì pơhà; nàng ờ ƀàs sìl tài bơh ală broă lơh tìs ờ niam ngan, ƀàs sìl ƀàs sồ, gơtìp tơl nă cau sền ờ sơ̆p tơñŏ tơnhial; nàng tus tŭ ñiam măt rơlồih tê, he gơtùi pơñiờ să đơs là: Jơh rài kis he, jơh bơta pràn he, he neh ơn pơdơng ai broă lơh dờng màng kwơmàng ngan rlau jơh tàm rài kis in- broă lơh tam dră dong klàs jơi bơtiàn, hồ toh kòn bơnus cèng wơl bơta chờ hờp ai làng bol in!