VOV4.K’ho - Ngai òr (25/01), hơ̆ là ngai 23 nhai 12 nam Tân Sửu, Tổng Ƀí thư ồng Nguyễn Phú Trọng mờ Tổng Ƀí thư, Củ tịc lơgar Lo ồng Tập Cận Bình neh pơyoa sră chờ gờm nam pa di tàm dơ̆ làng bol bàr lơgar Việt Nam mờ Lo rơcang wă rò satềp nam pa Ñâm Zần.

                                                        Tổng Ƀí thư ồng Nguyễn Phú Trọng

Wèt tus nam 2022, bàr Tổng Ƀí thư sồr ală ƀộ, gah lơh broă dà lơgar mờ ală tiah tàm càr lơgar lơh jăt nền nòn jơnau git wă bal dờng màng, chồl pràn broă lơh bal mùl màl bè lơh sa kă bro mờ bơcri priă, chồl pràn broă tìp bal làng bol mờ uă broă lơh, lơh broă bal nền nòn tàm gah rơcang sơndră mờ kòp gơtờp, sền gròi mờ bơsong niam ală jơnau ờ ring bal tàm tơngu me cri bơyai ring lơngai, di pal mờ adăt boh lam dunia, pơgồp bal ai broă lơh bal bàr lơgar rềp bal git gơ̆p, lơh broă bal jŏ jòng tơl ală bơta đah lơgar Việt Nam mờ lơgar Lo tơnguh bơtàu niam bơnĕ, kơl jăp, di pal mờ bơta kwơ tờm, jŏ jòng bơh bàr Đảng, bàr dà lơgar bal mờ làng bol bàr lơgar, tài bơta ring lơngai, ring niam, lơh broă bal mờ pas gơs tàm tiah do mờ tàm dunia. Bàr Tổng Ƀí thư chờ gờm Đảng, Dà lơgar bal mờ làng bol bàr lơgar Việt Nam mờ Lo wă rò satềp Ñâm Zần niam bơnĕ, gơboh gơbài mờ geh cồng nha.

Cau mblàng Ndong Brawl