VOV4.K’ho- Ngai 30/09, tàm Hìu duh broă Đảng Dà lơgar, Tổng Ƀí thư ồng Nguyễn Phú Trọng đơng lam pơrjum Ƀộ Cíñ trị nàng sền swì, lơh glài ồng Bùi Nhật Quang, Ủy viên Đảng Dà lơgar, Ủy viên Mpồl lơh jăt Đảng ƀộ Gah ală anih lơh broă dà lơgar, Ƀí thư Đảng ủy, Kwang ătbồ Viện Hàn lâm Jak chài mpồl bơtiàn Việt Nam.

Ồng Bùi Nhật Quang, Ủy viên Đảng Dà lơgar

Tơnơ̆ mờ tŭ sền swì jơnau sồr bơh Ủy ƀan Sền swì Dà lơgar dê, Ƀộ Cíñ trị sền gŏ là: Lơh tìs, bơta ờ niam bơh ồng Bùi Nhật Quang dê lơh gơlik jơnau gơlời wơl kơn jơ̆ ngan, lơh roh bơta tam klăc bal dơlam is, lơh ờ suk tàm kwang bàng, đảng viên, lơh gơrềng ờ niam tus bơngă pin dờn bơh mpồl đảng dê, Viện Hàn lâm Jak chài mpồl bơtiàn Việt Nam mờ să tờm dê. Jăt tàm tơngume, broă lơh tìs, bơta kơn jơ̆, jơnau gơlời wơl, jơnau bơh tài gơbàn lơh tìs; jăt jơnau cih bơh Đảng dê bè lơh glài đảng viên lơh tìs, Ƀộ Cíñ trị lơh nền lơh glài tơngkah ồng Bùi Nhật Quang. Sồr ală anih lơh broă geh gơnoar lơh glài mờ priă gơwèt mờ ồng Bùi Nhật Quang dùl ròt bal, di tŭ mờ lơh glài Đảng.

            Cau cih VOV Tây Nguyên- Cau mblàng Lơ Mu K’Yến