Drim ngai 03/01, neh geh lơh pơrjum pờ tơn tàm internet bơh Cíñ phủ dê mờ ală tiah tơn jơh broă lơh nam 2022 mờ lam lơh jăt Jơnau đơs pơndŭt bơh Dà lơgar dê, Kơrnoăt bơh Quôk hội khoă XV dê bè broă rơndăp lơh bơtàu tơnguh lơh sa- mpồl bơtiàn nam 2023.

Đơs tàm pơrjum, Tổng Ƀí thư ồng Nguyễn Phú Trọng đơs loh, Cíñ phủ mờ ală ƀộ, ngàñ, ală tiah pal pơn jăt tai sền gròi lơh sir adat boh lam, lơh niam wơl tiah bơcri priă kă bro, hòi tơrgùm mờ ngui geh cồng nha jơh ală bơta pràn, ngui jơh ală tŭ niam nàng bơtàu tơnguh wơl, bơtàu tơnguh lơh sa- mpồl bơtiàn mhar mờ kơ̆ kơl jăp. Tổng Ƀí thư ồng Nguyễn Phú Trọng đơs, nam 2022 Cíñ phủ neh lơh ngan lơh geh uă cồng nha mờ gơguh jak rlau mờ nam 2021 di bè jơnau kơ̆p kờñ bơh Tổng Ƀí thư dê tàm jơnau đơs sồr lơh tàm pơrjum nam lài. Pơnrơ là lơh sa lơgar he kung gam pơn jăt tai gơguh mhar, geh 8,02%, jơnhoa rlau uă pơndrờm mờ broă rơndăp lơh bơh 6 tus 6,5%, khà jơnhoa pơndrờm mờ ală lơgar tàm kơnhoàl ù tiah do mờ tàm dunia. Tổng Ƀí thư ồng Nguyễn Phú Trọng đơs sùm tai 5 broă gơcèng bơta pơlam gùng nàng pơrjum in cribơyai bal, tàm hơ̆, Cíñ phủ kờñ pal sền gròi lơh kơ̆ kơl jăp wơl, tơnguh tai bơnàng jă rài lơh sa dờng, gròi sền gơmù giă priă, tơnguh uă bơta pràn jak dơlam is mờ bơta rơcăng lài is bơh rài lơh sa dê.