VOV4.K’ho- Drim ngai 29/08, tàm Hìu lơh broă Đảng, Tổng Ƀí thư ồng Nguyễn Phú Trọng neh geh dơ̆ tìp mat 80 nă cau ala mat tus bal Pơrjum dờng cau ala mat gùt lơgar dơ̆ 11 Mpồl Cữ thập đỏ Việt Nam tơngai lơh broă bơh nam 2022-2027.

Anih tàm dơ̆ pơrjum

Mờ gơnoar  là Củ tịc danh dự bơh Mpồl Cữ thập đỏ Việt Nam khoá 10, Tổng Ƀí thư ồng Nguyễn Phú Trọng tơngŏ bơta chờ hờp geh tìp mat mpồl cau ala mat tus bal pơrjum dờng, mơkung pơyoa tus jơh gùt mpồl cau ala mat tus bal Pơrjum dờng kung bè jơh tơl nă cau Mpồl Cử thập đỏ tàm jơh gùt lơgar dê ală nùs nhơm rềp mềl, jơnau còp să jơh nùs mờ jơnau gờm chờ niam bơnĕ ngan rlau jơh. Tổng Ƀí thư ồng Nguyễn Phú Trọng đơs ngan, dong kờl kòn bơnus, nùs nhơm niam là dùl bơta niam bơnĕ, dùl bơhiàn kwơ màng bơh jơi bơtiàn he dê, tơngŏ bơta kờñ gơboh, bơta sền dờng màng mờ sền gàr kòn bơnus; là sơñio sồ, phan đo was bơh bơta jak chài mờ bơta gơguh jak mpồl bơtiàn dê. Tổng Ƀí thư ồng Nguyễn Phú Trọng sồr, tơngai lơh broă tus ală kấp Mpồl tàm jơh gùt lơgar pal sùm sền gròi broă lơh bơt bơtàu mpồl mờ kwang bàng, cau tàm mpồl bơh Mpồl dê; tơl nă kwang bàng, cau tàm mpồl lơh ngan lơh broă, bềng nùs nhơm kờñ gơboh bal, nàng pơn tai ngui niam gơnoar broă mờ bơta pin dờn bơh Mpồl dê ngai sơlơ uă.

Cau mblàng K’Hạnh