VOV4.K’ho- Lơh jăt broă lơh tìp măt mờ cau tĕ khà lài mờ dơ̆ pơrjum dơ̆ 3, Quôk hội khoă XV, drim ngai 12/05, Tổng Ƀí thư ồng Nguyễn Phú Trọng bal mờ ală kwang bàng tàm Mpồl kwang bàng Quôk hội ƀòn dờng Hà Nội, mpồl tĕ khà sồ 1, bơyai lơh tìp măt mờ cau tĕ khà ală quận: Đống Đa, Ba Đình, Hai Bà Trưng geh lơh bơh broă lơh tơn pơgồp bal mờ tìp mat bơh tàm internet.

Ala măt ală kwang bàng Quôk hội mpồl tĕ khà sồ 1, Tổng Ƀí thư ồng Nguyễn Phú Trọng ki ngàm iăt kơno ală jơnau đơs tă pơgồp jrô ơnàng, lơyah, đơs tơn tàm broă, geh kwơ ngan, loh làng ngan mơya gơcèng bơta jŏ jòng mờ geh kơnòl bơh cau tĕ khà dê, pơgồp bơnah tơnguh uă cồng nha lơh broă bơh Mpồl kwang bàng Quôk hội ƀòn dờng Hà Nội mờ Quôk hội khoă XV dê.

Đơs bè broă lơh rơcăng sơndră sa kwề sa kwà, bơta ờ niam, Tổng Ƀí thư ồng Nguyễn Phú Trọng pà gĭt, tàm pơrjum Dà lơgar 5 pa tơn jơh pa do, Dà lơgar neh ring bal uă ngan ring bal lơh Mpồl đơng lam kâp càr bè rơcăng sơndră sa kwề sa kwà bơta ờ niam nàng pơn jăt tai lơh jăt ală cồng nha neh lơh geh tàm 10 nam do, lơh geh bơta ring bal tàm tơrbŏ bal tus 63 càr mờ ƀòn dờng tàm jơh gùt lơgar pơgồp bơnah kơryan, rơcăng kơryan lài, gŏ ală cau gơplơ̆ gơhŭc tam gơl nùs nhơm gơlam tus sa kwề sa kwà, ờ niam mờ pơhì pơhà.

Cau mblàng Lơ Mu K’Yến