VOV4.K’ho- Mho ngai 11/10, Tổng Ƀí thư ồng Nguyễn Phú Trọng, Ƀí thư Quân ủy Dà lơgar neh đềt mềr tìp măt 80 nă cau ala măt ai rlau 450 nă cau ala măt gơwèt ală mpồl ling tàm jơh gùt ling klàng lòt Pơrjum dờng Đoàn Ơruh pơnu Kộng sản Hồ Chí Minh Mpồl ling klàng dơ̆ X, tơngai lơh broă bơh nam 2022- 2027.

Jơh gùt anih bơyai lơh dơ̆ tìp măt

Tơm bơh bơr đềt mềr mờ ală cau ala mat, Tổng Ƀí thư ồng Nguyễn Phú Trọng jờng rơ ală cồng nha mờ rơnàng kơnòm să jơh gùt ling klàng dê neh lơh geh tàm ală nam do mơkung geh jơnau sồr gơwèt mờ ơruh pơnu mpồl ling klàng mờ srơh ơruh pơnu mpồl ling klàng kờñ pal bơtàu tơnguh pràn kơldang, kơ̆ kơl jăp rlau tai.

Tổng Ƀí thư ồng Nguyễn Phú Trọng cùp rùp lời kir sơnrai mờ ală cau ala măt tàm dơ̆ tìp măt

Tàm hơ̆, pal tơrgùm tơnguh uă cồng nha broă lơh bơto bơtê cíñ trị, bồ tơngoh; bơto bơtê jơnau kờñ kăc màng dê, nùs nhơm, rài kis niam chài ai ơruh pơnu Mpồl ling klàng in tơngai bơh nam 2015- 2030, pơn jăt tai sền gròi mpồl đoàn pràn kơldang kơ̆ kơl jăp; Tơnguh uă bơta niam mờ cồng nha pơgồp bal lơh broă mờ mpồl đoàn ƀòn lơgar tàm ală ù tiah lơh pôs đồng, lơh niam broă lơh hòi jà lam sồr làng bol, bơ̆t bơtàu mpồl cíñ trị, lơh pràn kơldang rlau sền gàr dà lơgar lơngăp lơngai, bơtàu tơnguh lơh sa, niam chài mpồl bơtiàn pơgồp bơnah bơ̆t bơtàu bơta gĭt gơ̆p tam klăc bal pròc mhàm, ling klàng làng bol mờ lơh kơ̆ kơl jăp rlau nùs nhơm rơcăng lài sền gàr dà lơgar tàm làng bol.

Cau cih VOV Tây Nguyên- Cau mblàng Lơ Mu K’Yến