Tàm pơrjum, Tổng Ƀí thư ồng Nguyễn Phú Trọng, Củ tịc lơgar ồng Nguyễn Xuân Phúc, Thủ tướng Cíñ phủ ồng Phạm Minh Chính cih dờp, đơs niam bơta lơh ngan, pơn đơl pràn, nùs nhơm lơh krơh lài, lam lài mờ ală cồng nha lơh geh bơh Đảng ủy Kwang àng dà lơgar dê, Ƀộ Kwang àng dê tàm nam 2022; đơs nền, mpồl kwang àng làng bol neh lơh gơs jak ngan kơnòl broă geh jàu.

Bè kơnòl broă tàm tơngai tus, Tổng Ƀí thư ồng Nguyễn Phú Trọng sồr, Đảng ủy Kwang àng dà lơgar pơn jat tai gàr niam gơnoar broă lơh krơh lài, sền dờng màng broă lơh bơt bơtàu Đảng, bơt bơtàu mpồl kwang àng làng bol, sền do là kơnòl broă tờm bơh nam 2023 mờ ală nam pơn jat tai dê; ngui niam gơnoar broă lơh tờm tàm broă đơng lam, pơlam broă lơh sền gàr lơngăp lơngai, ring niam, pơgồp bơnah lam lơh jat geh cồng nha ală Nghị quyết Đảng dà lơgar dê bè bơtàu tơnguh lơh sa- mpồl bơtiàn mờ sền gàr dà lơgar, sền gàr lơngăp lơngai tus nam 2030, broă wèt sền tus nam 2045 bơh 6 tiah tàm gùt lơgar dê; lơh ngan pơn jat tai lơh geh uă cồng nha pa mờ lơh gơs jak ngan kơnòl broă geh jàu, tềng đap mat là nam 2023 mờ jơh gùt tơngai lơh broă bơh nam 2020 tus nam 2025.