VOV4.K’ho- Drim ngai 18/07, Tổng Ƀí thư ồng Nguyễn Phú Trọng tus mờ đơs tàm dơ̆ Tơngkah kir sơnrai 60 nam Ngai lơh bơta gĭt gơ̆p cribơyai broă mờ lơgar ndai (5/09), 45 nam Ngai kĭ Hiệp ước Lơh bơyô mờ Lơh broă bal Việt Nam mờ Lào (18/07), Nam tam klăc lơh bơyô bal Việt Nam mờ Lào, Lào mờ Việt Nam nam 2022 geh bơyai lơh yŭ rơyùm tàm càr lơgar Hà Nội.

                           Tổng Ƀí thư ồng Nguyễn Phú Trọng đơs tàm dơ̆ tơngkah kir sơnrai

                                   Kwang bàng đơng lam Đảng dà lơgar tus pơrjum tơngkah

Tus bal geh ală kwang đơng lam bồ, kwang đơng lam bồ Đảng, Dà lơgar lài do mờ ồng Bounthong Chitmany, Ủy viên Ƀộ Cíñ trị, Thường trực Ƀan Ƀí thư Đảng Làng bol Kăc màng lơgar Lào, Phó Củ tịc lơgar Lào lam bồ mpồl kwang bàng kấp dờng bơh Đảng, Dà lơgar Lào tus bal dơ̆ tơngkah kir sơnrai.

Đơs tàm dơ̆ tơngkah kir sơnrai, Tổng Ƀí thư ồng Nguyễn Phú Trọng đơs ngan 2 lơgar rềp bal rềp mềl, hùc bal hiòng dà dờng Mekong, kơldìng ngkời bal tàm dòr bơnơm Trường Sơn dờng ơning ơnàng, Việt Nam mờ Lào geh bơhiàn tŭ lơi kung kờñ gơboh bal, đềt mềl bal mờ gơ̆p tàm sùm tơngai jŏ jòng kah yau bơt bơtàu dà lơgar mờ sền gàr dà lơgar bơh 2 jơi bơtiàn dê. 2 Đảng, 2 dà lơgar mờ làng bol 2 lơgar ngai sơlơ kờñ pal tam klăc, đềt mềr, sơlơ tơnguh lơh broă bal rlau tai nàng bal mờ gơ̆p sơr lèt tơl bơta kal ke, pơn jat tai kơ̆ dơn jơnau kờñ lơngap lơngai is jơi bơtiàn mờ củ nghĩa xã hội; bal mờ gơ̆p lơh jơh bơta pràn he dê nàng sền gàr mờ sùm bơt bơtàu ai bơta gĭt gơ̆p lơh bơyô bal dờng màng, tam klăc bal kwơ màng mờ lơh broă bal tơl làm Việt Nam mờ Lào.

Cau mblàng K’Hạnh