VOV4.K’ho - Mho òr (10/08), tàm hìu lơh broă Đảng dà lơgar, Tổng Ƀí thư ồng Nguyễn Phú Trọng neh wă ồng A-nụ-phạp Tụ-na-lôm, Ƀí thư Đảng dà lơgar, Ƀí thư Thàñ ủy, Củ tịc Hội đồng Ñân zân càr lơgar Vientiane, lơgar Lào gam còp mờ lơh broă tàm lơgar Việt Nam.

Tổng Ƀí thư ồng Nguyễn Phú Trọng wă Ƀí thư Đảng dà lơgar, Ƀí thư Thàñ ủy, CTHĐÑZ càr lơgar Vientiane, lơgar Lào

Tàm dơ̆ wă, Tổng Ƀí thư ồng Nguyễn Phú Trọng đơs lơgar Việt Nam sùm sền kwơ mờ ai lài ngan broă lơh git gơ̆p bal kwơ màng là oh mi là gơ̆p bơyô bal đah lơgar Việt Nam mờ lơgar Lào, mờ kờñ bal pràn ngan, tơl ală bơta broă tam gơl pa lơgar Lào. Tổng Ƀí thư ồng Nguyễn Phú Trọng pà git broă lơh git gơ̆p đah lơgar Việt Nam mờ lơgar Lào ngai sơlơ tơnguh bơtàu, jrô ơnàng, mùl màl mờ geh cồng nha tàm ală gah broă, pơgồp bal kwơ màng tàm broă gàr kơl jăp cíñ trị, sền gàr bơta lơngăp lơngai dà lơgar mờ tơnguh bơtàu lơh sa mpồl bơtiàn tàm tơl lơgar dê, mờ đơs tus ală gùng dà broă lơh bè broă lơh bal đah ală gah, ală kấp bơh bàr Đảng, bàr dà lơgar tàm tơngai tus. Tổng Ƀí thư kơ̆p kờñ càr lơgar Vientiane pơn jăt tai pơgồp bal nền nòn mờ lơh broă bal mờ càr lơgar Hà Nội mờ ală càr, ƀòn dờng ndai lơgar Việt Nam dê tàm broă tơnguh jơnau tơngit, tam pà bal broă lơh mờng chài tơl ală bơta tàm ală gah broă.

Cau mblàng Ndong Brawl