VOV4.K’ho- Tàm hìu duh broă Đảng Dà lơgar dê, ồng Nguyễn Phú Trọng, Tổng Ƀí thư Ƀan cấp hàñ Đảng Kộng sản dà lơgar Việt Nam neh wă Ƀộ trưởng Ƀộ Ngoại giao lơgar Nga ồng Sergei Lavrov tus còp să di dơ̆ lòt còp Việt Nam.

Ƀộ trưởng Ƀộ Ngoại giao Nga ồng Sergei Lavrov ưn ngài Tổng Ƀí thư ồng Nguyễn Phú Trọng neh lời tŭ jiơ wă mờ yal bè cồng nha ală dơ̆ cribơyai, tìp măt lùp jơnau tàm dơ̆ lòt còp bè lơh broă bal tàm ală gah broă đah Nga mờ Việt Nam, đơs nền bơta sền dờng màng bơh lơgar Nga dê gơwèt mờ bơta gĭt gơ̆p tam klăc lơh broă bal jŏ jòng tơl làm đah 2 lơgar, kờñ bal gơnoar broă tiah tờm bơh Asean dê tàm kơnhoàl ù tiah do, ưn ngài bơta tă pơgồp bơh Việt Nam dê tàm broă tơnguh bơta gĭt gơ̆p đah Nga mờ Asean tàm ală nam do mờ tơlik nùs nhơm bơh Nga dê bè ală broă dunia, tàm hơ̆ geh dơ̆ tam lơh tàm lơgar Ukraine. Tổng Ƀí thư ồng Nguyễn Phú Trọng đơs nền, Việt Nam sền dờng màng bơta gĭt gơ̆p tam klăc lơh broă bal jŏ jòng tơl làm mờ lơgar Nga mờ lơh broă bal đah 2 lơgar; kơ̆p kờñ dơ̆ lòt còp bơh Ƀộ trưởng Ƀộ Ngoại giao Nga ồng Sergei Lavrov dê lơh geh cồng nha niam bơnĕ.

Cau mblàng Lơ Mu K’Yến