VOV4.K’ho- Ngai 13/09, tàm Hìu duh broă Đảng Dà lơgar, Tổng Ƀí thư ồng Nguyễn Phú Trọng wă Kwang ătbồ Ala măt Đảng Làng bol Campuchia (CPP), Củ tịc Quôk hội lơgar Campuchia ồng Samdech Heng Samrin gam geh dơ̆ lòt còp ngan ngồn Việt Nam. Tàm dơ̆ wă, Tổng Ƀí thư ồng Nguyễn Phú Trọng đơs nền bơta gĭt gơ̆p lơh broă bal đah bàr Đảng, bàr Dà lơgar mờ làng bol bàr lơgar ngai sơlơ bơtàu tơnguh gơlòt mŭt ngan ngồn tàm uă broă lơh, mờ geh ngan mờ cồng nha, cèng wơl bơta kwơ geh ngan ai làng bol tơl lơgar in.

Tổng Ƀí thư ồng Nguyễn Phú Trọng đơs nền, Đảng, Dà lơgar mờ Làng bol Việt Nam sùm kờñ bal broă lơh bơ̆t bơtàu mờ bơtàu tơnguh dà lơgar Campuchia, ưn ngài bơta kờñ bal mờ dong kờl bal kwơmàng mờ Campuchia neh lời ai Việt Nam in bơh lài tus tŭ do. Tổng Ƀí thư đơs sùm, bơhiàn mờ bơta kwơmàng bơh bơta gĭt gơ̆p đah 3 lơgar: Việt Nam- Lào- Campuchia mờ kơ̆p kờñ pe lơgar sền gàr bal, bơ̆t bơtàu ai bơta gĭt gơ̆p đah pe lơgar in ngai sơlơ bơtàu tơnguh, tài bơta pas gơs bơh tơl lơgar dê, tài bơta ring lơngai, kơ̆ kơl jăp, lơh broă bal mờ bơtàu tơnguh tàm tiah do mờ tàm dunia.

Cau mblàng Lơ Mu K’Yến