Ồng Samdech Say Chhum geh jơnau đơs chờ hờp lòt còp ngan ngồn Việt Nam tàm Nam Gĭt gơ̆p lơh bơyô bal Việt Nam mờ Campuchia, ưn ngài Tổng Ƀí thư ồng Nguyễn Phú Trọng neh wă rò mờ lời ai Mpồl in ală nùs nhơm đềt mềr ngan rlau jơh. Ồng đơs nền, Campuchia geh bal mờ Việt Nam sền gàr, prăp gàr, bơ̆t bơtàu mờ pơn jăt tai lời ai ală rơnàng kơnòm să tơnơ̆ do in bơta gĭt gơ̆p niam bơnĕ do kung bè bơta gĭt gơ̆p đah pe Đảng, pe Dà lơgar Campuchia- Việt Nam- Lào. Ồng Samdech Say Chhum neh yal mờ Tổng Ƀí thư ồng Nguyễn Phú Trọng bè cồng nha dơ̆ cribơyai mờ Củ tịc Quôk hội Việt Nam ồng Vương Đình Huệ, broă lơgar Campuchia dê tàm tơngai rềp ndo.

Tổng Ƀí thư ồng Nguyễn Phú Trọng wă Củ tịc Thượng viện Campuchia ồng Samdech Say Chhum

Tổng Ƀí thư ồng Nguyễn Phú Trọng jờng rơ ngan bơta kwơ màng mờ cồng nha dơ̆ lòt còp bơh ồng Samdech Say Chhum dê, đơs nền bơta gĭt gơ̆p đah 2 lơgar kung bè đah pe lơgar Việt Nam- Lào- Campuchia pơgồp bơnah kwơmàng dong tơl lơgar in bơtàu tơnguh pas sơm, làng bol geh rài kis hờm ram, lơngăp lơngai chờ hờp chờ hờñ. Ồng Tổng Ƀí thư tàm lùp bè ală gùng dà broă lơh dờng nàng kờñ tơnguh tai bơta gĭt gơ̆p 2 lơgar tàm tơngai tus, kwơmàng là ală broă lơh tìp măt kwang bàng kâp dờng đah bàr Đảng, Cíñ phủ, Quôk hội, ƀộ, ngàñ, mpồl cau, ƀòn lơgar dê mờ tề lam, pơn jăt tai lời ai rơnàng kơnòm să in bè bơhiàn bơh yau bơta gĭt gơ̆p đah Việt Nam mờ Campuchia.