Tổng Ƀí thư ồng Nguyễn Phú Trọng đơs niam cồng nha cri bơyai đah Củ tịc Thượng viện lơgar Tây mờ Củ tịc Quốk hội ồng Vương Đình Huệ, cri bơyai bè gơnoar kwơ màng bơh Quốk hội lơgar Việt Nam tàm rài kis dà lơgar bal mờ tàm bơta git gơ̆p lơh broă bal mờ lơgar ndai lơgar Việt Nam dê.

Bàr kwang đơng lam đơs tờm tus mờ gơnoar bơh anih lơh adăt boh lam bàr lơgar tàm bơta git gơ̆p đah bàr lơgar, sồr bàr gah tơnguh bơtau geh lơh broă bal dờng màng mờ ală cồng nha lơh broă bal neh lơh geh tàm tơngai do, lơh pràn broă cri bơyai, tìp bal kấp dờng mờ ală kấp tàm jơh ală gah Đảng, Dà lơgar, Quốk hội mờ làng bol, tơnguh broă pơgồp bal, tam pà bal nùs nhơm đah anih lơh broă adăt boh lam bàr lơgar tàm ală pơrjum uă lơgar. Tổng Ƀí thư ồng Nguyễn Phú Trọng kung hòi jà bàr đah pơn jăt tai lơh pràn nàng ai bơta git gơ̆p mờ lơh broă bal jŏ jòng tus tơngai tơnguh bơtàu pa, cèng geh bơta kwơ mùl màl ai làng bol bàr lơgar in tàm jơh ală gah broă mờ geh pơgồp bal tus tàm bơta ring lơngai, lơh broă bal, tơnguh bơtàu tàm tiah do mờ tàm dunia.