Tàm dơ̆ wă, Đại sứ ồng Sẻng-phết Hùng-bun-nhuông ai lơh chờ hờp ngan bè bơta git gơp tam klac bal kuơmàng Lào mờ Việt Nam ngai sơlơ bơtàu tơnguh jrô ơnàng, cèng wơl bơta kuơ ngan ngồn ai làng bol tơl lơgar in, đơs nền bơta kuơmàng bơh git gơp dờng màng Lào- Việt Nam dê mờ đơs ngan, bulah tàm gơnoar broă lơi kung rơp pơn jat tai lơh jơh pràn nàng bơt bơtàu ai bơta git gơp tam klac bal kuơmàng Lào- Việt Nam sùm hàng niam, sùm kơ̆ kơljap.

Tổng Ƀí thư ồng Nguyễn Phú Trọng nting bơr gờm chờ să tờm ồng Đại sứ neh lơh gơs jak ngan kơnòl broă mờ ală cồng nha kuơmàng mờ lơgar Lào neh lơh geh tàm tơngai lài, đơs ngan, Việt Nam sùm dong kờl broă lơh tam gơl pa bơh lơgar Lào dê, mờ kung pin dờn, tềng đap bơta đơng lam bồ bơh Đảng Làng bol kac màng Lào dê, làng bol lơgar Lào rơp pơn jat tai lơh geh uă cồng nha pa, dờng màng rlau tai tàm broă lơh jat Nghị quyết pơrjum dờng dơ̆ XI bơh Đảng Làng bol kac màng Lào dê.