VOV4.K’ho - Mho òr (25/04), tàm hìu lơh broă Đảng dà lơgar, Tổng Ƀí thư ồng Nguyễn Phú Trọng neh wă Đại sứ lơgar Mỹ ồng Marc E. Knapper tus tìp di tàm dơ̆ sơn đờm tơngai lơh broă tàm lơgar Việt Nam.

Đại sứ lơgar Mỹ ồng Marc E. Knapper ưn ngài Tổng Ƀí thư ồng Nguyễn Phú Trọng neh ai tơngai wă, tơlik nùs nhơm chờ hờp mờ pơnyờ să ngan geh tus wơl lơh broă tàm lơgar Việt Nam tàm gơnoar broă là Đại sứ lơgar Mỹ tàm lơgar Việt Nam. Đại sứ lơgar Mỹ ồng Marc E. Knapper đơs, lơgar Mỹ kờñ dùl dà lơgar Việt Nam pràn, lơngăp lơngai is, pas gơs mờ chồl pràn broă lơh git gơ̆p bal đah bàr lơgar ai bơh tàm tơngu me git jơnau bal mờ ală thể cế cíñ trị bal. Đại sứ geh lơh ngan nàng pơgồp bal tàm broă tơnguh bơtàu broă lơh git gơ̆p đah lơgar Mỹ mờ lơgar Việt Nam. Tổng Ƀí thư ồng Nguyễn Phú Trọng chờ gờm Đại sứ lơgar Mỹ ồng Marc E. Knapper dờp kơnòl kwơ màng pa tàm lơgar Việt Nam; sồr Đại sứ ồng Marc E. Knapper pơn jăt tai pơgồp bal niam mờ broă tơnguh bơtàu broă lơh git gơ̆p đah bàr lơgar mờ geh uă cồng nha tàm tơngai lơh broă tàm lơgar Việt Nam.

Cau mblàng Ndong Brawl