Tổng Ƀí thư ồng Nguyễn Phú Trọng jờng rơ Củ tịc Quôk hội lơgar Cuba ala mat kwang đơng lam bồ Đảng, Dà lơgar Cuba lòt tus bal Dơ̆ bơyai lơh tơngkah dơ̆ do, ai tơnggŏ bơta ki ngàm bơh kwang đơng lam bồ Đảng, Dà lơgar Cuba oh mi dê gơ wèt mờ bơta git gơp lơh bơyô kuơmàng Việt Nam – Cuba. Tổng Ƀí thư ồng Nguyễn Phú Trọng đơs nền, Việt Nam sùm sền dờng màng, sền gàr mờ pơn đơl pràn lơh niam rlau tai bơta git gơp tam klac ờs mờng kuơmàng mờ lơh broă bal tơl làm Việt Nam – Cuba mờ nùs nhơm ờ tŭ lơi tam gơl sùm tam klac bal, dong kờl lơgar Cuba, dră wơl mờ hòi jà tơn jơh broă lơh wàng se, kơryan dră wơl Cuba. Bàr nă kwang đơng lam bồ ring bal pơn jat tai lơh kơ̆ kơljap bơnàng jă bơta git gơp Cíñ trị đah 2 Đảng, lơh pơlam gùng dà ai bơtàu tơnguh lơh bơta git gơp lơh broă bal đah 2 lơgar in, sồr ală ƀộ, gah broă lơh, mpồl bal mờ ală tiah bơh 2 lơgar dê lơh broă bal jơh nùs, lam lơh jat ngac ngar ală jơnau ring bal kâp dờng, broă lơh, hiệp địñ neh kĭ nàng lơh gơlik bơta bơtàu tơnguh pa tàm lơh broă bal lơh sa, kă bro, bơcri priă, lơh sa suơn sre, bơto bơsram, kông nghệ siñ họk, lơh sơnơm.