Tổng Ƀí thư ồng Nguyễn Phú Trọng gờm chờ ồng Chăn-xa-mỏn Chăn-nha-lạt lam bồ mpồl kwang bàng ling klàng kấp dờng lơgar Lào tus còp ngan ngồn lơgar Việt Nam; jờng rơ uă ngan bơhiàn yau, cồng nha lơh broă bal đah mpồl ling klàng 2 lơgar lài do kung bè tŭ do, cồng nha dơ̆ tìp mat cribơyai đah 2 nă Ƀộ trưởng Quôk phòng.

Tổng Ƀí thư sồr Ƀộ Quôk phòng 2 lơgar pơn jat tai lơh jat niam bơhiàn bơh he dê, lơh jat geh cồng nha ală kơnòl broă cíñ trị geh jàu, pơgồp bal niam lam lơh geh cồng nha Nghị địñ thư mờ broă lơh, broă rơndap lơh lơh broă bal đah 2 Ƀộ Quôk phòng dê, pơn jat tai mblàng yal jrô ơnàng làm uă bơta kwơ kah yau, bơta kwơ màng bơh bơta gĭt gơ̆p kwơ màng Việt Nam mờ lào tàm jơh gùt mpồl ling klàng. Tổng Ƀí thư ồng Nguyễn Phú Trọng ưn ngài lơgar Lào neh lời ai Việt Nam in bơta kờñ mờ dong kờl uă ngan bơh lài tus tŭ do, tàm hơ̆ geh bơta tam klăc bal, đềt mềr sùm, dong kờl bơh mpồl ling klàng Lào dê; đơs nền bơta kwơ bơh bơta gĭt gơ̆p kwơ màng Việt Nam mờ Lào ờ mìng là 2 lơgar rềp bal, mờ gam là oh mi rềp mềr, kong bal bơta bòl glar kal ke tàm broă lơh tam lơh dong klàs jơi bơtiàn tơrgùm dùl dà lơgar kung bè tàm broă lơh bơt bơtàu mờ sền gàr dà lơgar tŭ do dê.