VOV4.K’ho- Mho ngai 20/05, tàm hìu duh broă Đảng Dà lơgar, Tổng Ƀí thư ồng Nguyễn Phú Trọng neh wă rò Củ tịc Quôk hội Singapore ồng Tan Chuan-jin mờ mpồl kwang bàng Quôk hội lơgar Singapore gam còp ngan ngồn Việt Nam.

Ồng Tan Chuan-jin tơlik nùs nhơm chờ hờp dơ̆ sơnrờp lòt còp ngan ngồn, geh sền gŏ ală cồng nha dờng ngan tàm bơtàu tơnguh lơh sa- mpồl bơtiàn bơh Việt Nam dê. Củ tịc Quôk hội Singapore yal mờ Tổng Ƀí thư in cồng nha dơ̆ cribơyai broă mờ Củ tịc Quôk hội ồng Vương Đình Huệ, tàm hơ̆ geh broă 2 gah neh kĭ Sră cih kah bè lơh broă bal, dùl nùs bal sơlơ lòt còp, tìp măt bal mờ gơ̆p đah ală nghị sĩ, lơh broă bal đah ală ủy ƀan sùm lơh kơnòl broă ờs mờng, tàm yal bal bơta mờng chài tàm ală gah broă lơh bơh quôk hội 2 lơgar dê mờ lơh broă bal tàm ală pơrjum dunia.

Tổng Ƀí thư ồng Nguyễn Phú Trọng jờng rơ dơ̆ lòt còp Việt Nam bơh Củ tịc Quôk hội Singapore dê, tơlik nùs nhơm pin dờn là dơ̆ lòt còp geh là tềl kah kwơmàng tàm tŭ 2 lơgar gam wèt tus tơngkah kir sơnrai 50 nam lơh bơta gĭt gơ̆p lơh broă bal mờ 10 nam lơh bơta gĭt gơ̆p Tam klăc lơh broă bal jŏ jòng đah 2 lơgar tàm nam 2023.

Cau mblàng Lơ Mu K’Yến