Tổng Ƀí thư ồng Nguyễn Phú Trọng jờng rơ ồng David Hurley, Kwang ala măt lơgar Australia bal mờ pơ ùr mờ mpồl kwang bàng kâp dờng ala măt lơgar Australia lòt còp lơgar Việt Nam; jờng rơ ngan bơta bơtàu tơnguh uă ngan, uă bơta tàm ală gah broă lơh broă bal đah 2 lơgar Việt Nam mờ Australia tàm tơngai lài, ngan là kă bro mờ lòt còp lơh kwèng bal đah làng bol 2 lơgar dê. Tơnơ̆ tŭ iăt ồng David Hurley yal bè cồng nha dơ̆ cribơyai, tìp măt tơm bơh bơr mờ ală kwang bàng đơng lam bồ lơgar Việt Nam dê mờ ală broă lơh bơh Mpồl dê, Tổng Ƀí thư ồng Nguyễn Phú Trọng dùl nùs bal mờ gùng dà bơtàu tơnguh gĭt gơ̆p bàr lơgar tàm tơngai tus mơkung đơs sùm ală cồng nha lơh geh tàm tŭ lam lơh jăt bơta gĭt gơ̆p Tam klăc lơh broă bal Jŏ jòng đah Việt Nam mờ Australia là bơnàng jă nàng bàr lơgar in wèt tus ală tŭ tơngai pa uă rlau.

Tổng Ƀí thư đơs sùm, Việt Nam lơh jăt gùng dà broă lơh lơh broă mờ lơgar ndai krơi is, rơcăng lài is, ring lơngai, lơh broă bal, sồr bàr gah lơh pràn gĭt gơ̆p cíñ trị, lơh jăt geh cồng nha ală jơnau ring bal neh kĭ hơ mờ chồl tơnguh lòt còp lơh kwèng bal đah làng bol 2 lơgar, sơlơ pơgồp bal tàm ală broă dunia, kơ̆p kờñ ală anih lơh broă bàr gah dê geh ală broă rơndăp lơh, broă lơh loh làng, jăt tơl tŭ tơngai nàng pơn jăt tai ai lơh broă bal đah bàr lơgar ngai sơlơ gơlòt mŭt ngan ngồn tàm uă broă, geh kwơ mờ geh cồng nha.