Tổng Ƀí thư yal bè ală cồng nha dờng ngan, tơl làm mờ lơgar Việt Nam pơnđơl pràn lơh ngan lơh geh, lơh mòn geh broă lơh dờng màng ngan, bơta pràn, gơnoar broă, mờ bơngă pin dờn dunia bè ngai do; đơs nền gùng dà lơh broă mờ lơgar ndai krơi is, rơcăng lài is, lơh bơyô mờ uă lơgar, lơh uă bơta gĭt gơ̆p lơh broă mờ lơgar ndai, tàm hơ̆ sùm sền kwơmàng gĭt gơ̆p mờ ală lơgar ơm rềp bal.

Thủ tướng lơgar Malaysia ồng Anwar Ibrahim yal mờ Tổng Ƀí thư ồng Nguyễn Phú Trọng bè cồng nha dơ̆ tìp măt cribơyai mờ Thủ tướng Cíñ phủ ồng Phạm Minh Chính, đơs sùm kơ̆p kờñ sơlơ tơnguh lơh broă bal tơl làm mờ lơgar Việt Nam, tàm hơ̆ geh gĭt gơ̆p Đảng, tam pà bal mờng chài đơng lam mờ bơtàu tơnguh, lơh broă bal lơh sa, sền gàr dà lơgar, lơngăp lơngai mờ tàm ală gah broă lơh pa bè tam gơl lơh sa mờ măy mok, lơngăp lơngai internet mờ rơcăng lài sơrlèt gan mờ ală bơta lòng lơngăp lơngai ờ hềt geh bơh lài.

Ồng Anwar Ibrahim yal mờ Tổng Ƀí thư bè broă rơcăng sơndră sa kwề sa kwà, bơta ờ niam tàm lơgar Malaysia mờ kơ̆p kờñ 2 gah sơlơ lơh broă bal, tàm yal tơngĭt bal mờng chài tàm gah broă lơh do. Tổng Ƀí thư ồng Nguyễn Phú Trọng tơlik nùs nhơm pin dờn là dơ̆ lòt còp bơh Thủ tướng lơgar Malaysia ồng Anwar Ibrahim dê là tềl kah pa, pơgồp bơnah chồl tơnguh bơta bơtàu tơnguh bơh gĭt gơ̆p tam klăc lơh broă bal kwơmàng jŏ jòng đah 2 lơgar.