VOV4.K’ho- Mho ngai 21/3, tàm hìu lơh broă Đảng dà lơgar, Tổng Ƀí thư ồng Nguyễn Phú Trọng neh wă ồng Dato’ Sri Ismail Sabri bin Yaakob, Thủ tướng Cíñ phủ Malaysia tus lùp còp tàm tơngai còp ngan ngồn lơgar Việt Nam. Thủ tướng Malaysia yal mờ Tổng Ƀí thư bè cồng nha tìp mat cribơyai broă mờ Thủ tướng Phạm Minh Chính, đơs nền Malaysia sền dờng màng git gơp lơh broă bal jŏ jòng mờ Việt Nam, kơp kờñ 2 gah tơnguh lơh broă bal 2 lơgar tàm ală gah lơh sa, kă bro, bơcri priă mờ tìp mat lơh quèng làng bol, ai tơnggŏ tŭ lơi kung kờñ tơnguh lơh broă bal nhơl chờ mờ lơh broă bal tàm gah dà lềng mờ Việt Nam nàng kờñ ngui bơta pràn bơh 2 lơgar dê.

Tổng Ƀí thư ồng Nguyễn Phú Trọng kung neh cribơyai mờ Thủ tướng Malaysia bè cồng nha bơtàu tơnguh lơh sa mpồl bơtiàn bơh Việt Nam dê, đơs nền broă lơh ờ tam gơl bơh Việt Nam dê sền dờng màng mờ kờñ sơlơ tơnguh git gơp lơh broă bal jŏ jòng mờ Malaysia, sồr 2 gah tơnguh ală cồng nha lơh geh, tơnguh cồng nha ală kơ cế lơh broă bal, tàm hơ̆ geh sơlơ tơnguh git gơp đah ală đảng tờm, tơnguh lơh broă bal 2 lơgar kung bè tàm mpồl ASEAN mờ ală cribơyai tàm tiah do mờ tàm dunia.

Cau mblàng K’Duẩn