Tàm dơ̆ wă, Tổng Ƀí thư ồng Nguyễn Phú Trọng pơn jờng Thủ tướng lơgar Singapore ồng Lý Hiển Long mờ Mpồl kwang bàng ala măt kấp dờng lơgar Singapore còp lơgar Việt Nam di tàm dơ̆ bàr lơgar tơnkah 50 namcrơng gơs bơta git gơ̆p cri bơyai broă mờ lơgar ndai mờ 10 nam crơng gơs bơta git gơ̆p Lơh broă bal jŏ jòng.

Tổng Ƀí thư kung tơlik nùs nhơm chờ hờp bè bơta bơtàu tơnguh bơh bơta git gơ̆p đah bàr lơgar dê, ai tơngŏ bơta sền kwơ gơwèt mờ broă tơnguh bơta git gơ̆p mờ lơgar Singapore là lơgar rềp bal geh ù tiah kwơ màng tàm tiah do mờ tàm dunia. Thủ tướng lơgar Singapore ồng Lý Hiển Long yal mờ Tổng Ƀí thư ồng Nguyễn Phú Trọng bè cồng nha cri bơyai mờ Thủ tướng ồng Phạm Minh Chính bal mờ ală kwang đơng lam lơgar Việt Nam; ring bal mờ ală jơnau kờñ bơh Tổng Ƀí thư ồng Nguyễn Phú Trọng bè lơh broă bal, sền hơ̆ là ală gùng dà broă lơh kwơ màng ai broă lơh bal đah bàr lơgar dê tàm tơngai tus.

Kung tàm ngai òr (28/08), tàm Hìu duh broă Củ tịc, Củ tịc lơgar ồng Võ Văn Thưởng neh wă Thủ tướng lơgar Singapore ồng Lý Hiển Long. Bàr kwang đơng lam tơlik nùs nhơm di pal ngan tềng đăp mờ bơta bơtàu tơnguh jrô ơnàng mờ geh uă cồng nha niam bal mờ mùl màl tàm bơta git gơ̆p đah bàr lơgar dê tàm 50 nam do, tàm hơ̆ uă ngan là lơh broă bal lơh sa, lơngăp lơngai, sền gàr dà lơgar, bơto bơtê mờ bơsram.