Mho ngai 21/10, tàm Hìu duh broă Đảng Dà lơgar, Tổng Ƀí thư ồng Nguyễn Phú Trọng neh wă Tổng Thư kĭ Liên hợp quôk ồng Antonio Guterres.

Tổng Ƀí thư ồng Nguyễn Phú Trọng wă Tổng Thư kĭ Liên hợp quôk

Tổng Ƀí thư ồng Nguyễn Phú Trọng neh bal mờ ồng Tổng Thư kĭ Liên hợp quôk cribơyai bè bơhiàn kah yau mờ bơta niam chài bơh dà lơgar Việt Nam dê mờ ală bơta niam bơnĕ tàm nùs nhơm bơh kòn bơnus Việt Nam dê; cribơyai bè ală cồng nha tơl làm mờ Việt Nam neh lơh geh tàm 35 nam tam gơl pa, ală cồng nha uă ngan neh lơh geh tàm ală nam rềp ndo tàm broă tam dră wơl mờ kòp dờng Kovid-19, bơtàu tơnguh wơl lơh sa lơh geh khà gơguh tai uă ngan, sền gàr lơngăp lơngai rài kis mpồl bơtiàn. Tổng Ƀí thư đơs nền, Việt Nam ờ tŭ lơi tam gơl lơh jăt gùng dà lơh broă mờ lơgar ndai krơi is, rơcăng lài is, ring lơngai, lơh bơyô bal, lơh broă bal mờ bơtàu tơnguh, lơh uă bơta gĭt gơ̆p, lơh bơyô mờ uă lơgar; là lơgar tàm mpồl jơh nùs ngan geh kơnòl tàm mpồl bơtiàn dunia.