VOV4.K’ho- Ngai 20/4, Sở Văn hoá, Thể thao mờ Zu lịc càr Lâm Đồng neh bơyai lơh pơrjum ƀăo yal Tơng leh kuơ màng Nhơl chờ Lâm Đồng nam 2022. Tơng leh geh bơyai lơh tàm ƀòn dờng Dà Làc bơh ngai 21 tus jơh ngai 30/4, mờ ală broă lơh tờm bè:  ù tiah yal tơngĭt mờ yal tơngĭt nhơl chờ, yal tơngĭt phan sa “phan sa bơkah Dà Làc”, ală phan lơh geh bơh suơn sre pơn rơ ngan, bơta niam chài ală jơi bơtiàn kòn cau tàm càr, broă lơh gơ hòi gơ jà nhơl chờ “ngai kwơ màng mờ jiơ kwơ màng” bơh ală mpồl lơh broă sa dê,...

Kờp dŭ tàm dơ̆ ơm rlô ngai 30/4 tus do geh gal ngan năc lòt nhơl tàm Dà Làc

Do là broă lơh niam chài- nhơl chờ, phan sa mờ tàp pràn să jan nàng kờñ yal tơngĭt, gơ hòi gơ jà năc tus mờ ƀòn dờng Dà Làc càr Lâm Đồng dê, kung bè prap gàr, ngui niam bơta niam chài rơgơi  ală jơi bơtiàn kòn cau, lơh niam wơl mờ bơtàu tơnguh ală ƀòn lơh broă ờs mờng gơ jat bal mờ broă lơh nhơl chờ. Bơh hơ̆, pơgồp bơnah gơ hòi gơ jà nhơl chờ ai càr Lâm Đồng in, mờ jơnau kờñ gơ hòi gơ jà geh rlau 5 tơlak nă năc lòt nhơl tàm nam do.

Cau mblàng K’Hạnh