VOV4.K’ho- Tàm hìu lơh broă Liên hợp quôk tàm New York, lơgar Mỹ, Tổng Thư ký Liên hợp quôk ồng Antonio Guterres neh wă Đại sứ ồng Đặng Hoàng Giang, kwang atbồ mpồl kwang bàng lơh broă sùm lơgar Việt Nam tàm Liên hợp quôk. Tổng Thư ký ồng Antonio Guterres jơh nùs nting bơr gờm chờ Việt Nam neh geh tơn pồ gơs lơgar geh jơng tàm Mpồl duh broă gơnoar kòn bơnus bơh Liên hợp quôk dê, tơngai lơh broă bơh nam 2023 tus nam 2025, pin dờn Việt Nam geh pơn jat tai tă pơgồp jơh nùs, geh cồng nha tàm broă sơlơ tơnguh rlau tai mờ sền gàr gơnoar kòn bơnus.

Đại sứ Đặng Hoàng Giang mờ Tổng Thư ký Liên hợp quôk ồng Antonio Guterres

Tổng Thư ký chờ hờp đơs nền, ồng geh lòt còp ngan ngồn lơgar Việt Nam di dơ̆ tơngkah 45 nam ngai Việt Nam mut tàm Liên hợp quôk (1977- 2022). Đại sứ Đặng Hoàng Giang đơs sùm bơta kuơmàng bơh dơ̆ lòt còp bơh Tổng Thư ký dê, đơs nền Việt Nam hơ pơrgon lơh ngan tă pơgồp jơh nùs ai broă lơh bal bơh Liên hợp quôk dê, tàm hơ̆ geh sơlơ tơnguh ală jơnau kờñ bơtàu tơnguh kơ̆ kơljap, sơndră mờ tam gơl trồ tiah mờ gàr sùm ring lơngai, lơngăp lơngai dunia.

VOV Tây Nguyên- Cau mblàng K’Duẩn