Ală pơgru sền gròi broă bơto bơtơl wơl ală bơta gĭt wă, tơrgùm bơsram tàp bơta chài, broă chài lơh jơnau ai pơrlòng bè lơi gơ in mhar, di ngan jăt jơnau sồr bơh jơnau ai pơrlòng dê, dong ală oh geh bơta rơcăng lài niam ngan rlau jơh nàng mŭt tàm dơ̆ pơrlòng kwơmàng do.

Jăt ồng Phạm Đăng Khoa, Kwang ătbồ Sở Giáo zụk mờ Đào tạo càr Dăk Lăk dê đơs, nam do, jơh gùt càr geh rlau 21 rbô nă kơnòm bơsram cih măt tus bal dơ̆ pơrlòng jơh bơsram kâp pe. Sở neh sồr ală hìu bơsram geh kơnòm pơrlòng tus bal pơrlòng jơh bơsram kâp pe tơnơ̆ tŭ tơn jơh tơngai bơsram dơ̆ 2 bơh nam bơsram dê rơ̆p jơh nùs bơtơl wơl jơnau gĭt wă, lam lơh sền swì bơta pràn jak jăt ală jơnau ai pơrlòng sền nàng gĭt tai mờ Ƀộ Giáo zụk mờ Đào tạo dê ai nàng săc rwah kơnòm pơrlòng bơsram wơl gơ in dipal. Mờ bơta rơcăng lài nền nòn bơh gờñ, gah Bơto bơtê càr Dăk Lăk gơn kơnờm dơ̆ pơrlòng jơh bơsram kâp pe nam do ală oh rơ̆p lơh geh ală cồng nha uă ngan rlau jơh.