Tiah rềp nhàr bal đah càr Gia Lai mờ ală càr geh bơta jòng 418 kơi sồ, ù tiah kòl kan. Tơnơ̆ 8 nam kĭ hơ pơgồp bal, ală mpồl lơh broă geh gơnoar neh lam lơh rlau 1 rbô 800 dơ̆ lòt sền, jòi kŭp mờ gŏ 565 dơ̆ lơh tìs adăt boh lam broă brê bơnơm. Kờp jơh bă brê gơtìp mus kơl rlau 45 rbô thơk vuông, kŭp ai rlau 600 khối dơm chi mờ lơh glài rlau 2 tơmàn đong. Tiah rềp nhàr đah 3 kơnhoàl: Krông Pa, Sông Hinh mờ Krông Năng là “tiah gơbàn uă ngan” bơh jơnau sơgràm aniai brê dê, is ồn là gơ wèt mờ Tiah prăp gàr brê bơnơm geh is Ea Sô.

Tàm pơrjum, ală cau ala măt đơs là, jơnau tờm gơlam tus jơnau mus kơl brê là tài bơh adăt boh lam, broă lơh gam ờ hềt dipal, broă lơh glài bơsong ờ hềt tơl pràn pơhìn, bơta ờ pràn jak bơh ală cau tờm brê dê. Broă lơh sền gàr brê gam uă bơta lòng, gơ sồr ală tiah, ală gah broă kờñ pal pơn jăt tai pơgồp bal niam rlau mờ lơh jăt dồ ròt bal ală broă lơh.