VOV4.K’ho - Ngài mờ tiah tờm càr Kon Tum rơlao 100 kơi sồ, Đăk Glei là kơnhoàl tiah nhàr dà lơgar rơƀah ngan càr Kon Tum dê, mờ mờr 90% khà kờp làng bol là kòn cau, 11 tàm 12 xã, thị trấn gơwèt mpồl kal ke. Kơnờm mờ broă lơh jăt niam broă bơ̆t bơtàu Đảng tàm tiah làng bol kòn cau, Đăk Glei neh tơnguh bơhiàn kăc màng, bơ̆t bơtàu tiah nhàr dà lơgar ring niam lơngăp lơngai cíñ trị, gàr niam bơta ờ do ờ dă mpồl bơtiàn. Tơl nă cau geh đảng sùm là ală cau tờm, lam lài tàm ală broă pơrlòng kờñ gơboh mờ dà lơgar.

Bi A Cu (đah kiao), Ci ủy viên, kwang atbồ ƀòn Đăk Ga, xã Đăk Nhoong, kơnhoàl Đăk Glei tìp măt mờ lam sồr làng bol sơbì bơhiàn ờ niam

Gơwèt mờ làng bol kis tàm ƀòn Đăk Ga, xã tiah nhàr dà lơgar Đăk Nhoong, kơnhoàl Đăk GLei, càr Kon Tum, pah tŭ Ci ƀộ tơmŭrt cau geh đảng pa là broă lơh kwơ màng bal bơh ƀòn lơgar dê. Tŭ do, Ci ƀộ ƀòn Đăk Ga geh 25 nă cau geh đảng mờ jơh ală cau geh đảng do ndrờm là kòn cau Jeh-Triêng. Bi A Cu, Ci ủy, kwang atbồ ƀòn pà git: “Mŭt Đảng là chờ hờp mờ pơnyờ să ngan. Tŭ geh mŭt Đảng, să tờm añ tam gơl uă ngan. Añ geh tìp mờ uă bơta niam, geh kwơ bơh tŭ hơ̆ geh bơto pơlam làng bol tàm ƀòn. Cau geh đảng là pal lam lài, bơto sồr làng bol tàm broă tơnguh bơtàu lơh sa. Kwơ màng ngan tŭ do là tam gơl nùs nhơm kơlôi sơnơng, broă lơh pal bơceh lơh geh broă pa, broă lơh niam. Bơhiàn ờ niam tŭ do rơhời geh sơbì, bơhiàn niam den geh prăp gàr wơl. Añ là dùl nă kwang atbồ ƀònden añ lam sồr làng bol tàm ƀòn tơriang tơriồng tàm broă lơh sa, bơ̆t bơtàu hìu nhă hờm ram mờ gơboh gơbài”.

Xã tiah nhàr dà lơgar Đăk Nhoong geh Huyện ủy Đăk Glei đơs là dùl tàm ală xã lơh niam broă tơnguh bơtàu Đảng tiah làng bol kòn cau. Tŭ do Đảng ƀộ xã geh 184 nă cau geh đảng, tàm hơ̆ geh 156 nă cau geh đảng là kòn cau. 6 nhai bồ nam do, xã neh geh tai 8 nă cau geh đảng pa. Ồng A Nang, Phó Ƀí thư Đảng ủy xã Đăk Nhoong đơs, tàm nam do di gơlan Đảng ƀộ xã lơh gơs jơnau kờñ bè tơnguh bơtàu 15 nă cau geh đảng pa. Dùl tàm ală broă lơh mờng chài bơh Đảng ƀộ dê là broă sền sơwì sră nggal pal di tŭ mờ di cau: “Tŭ Ci ƀộ dờp, sền sơwì sră mờ jun tus bol añ sền sơwì den sơlơ gờñ sơlơ niam. Bol añ pơrjum Mpồl đơng lam pah nhai dùl nă, 2 nă bol añ kung jun sơl. Ală cau tơnơ̆ mờ tŭ gŏ lơh mhar, sền sơwì mhar di mờ di pal den tơnơ̆ do gŏ geh lơh ngan nàng mŭt Đảng uă rơlao. Di lah he lời sră nggal tàm 1 poh, 2 poh, tàm anih ndai tai 1 poh, 2 poh, geh roh jơh nam kung ờ hềt gơs lơh broă sơl”.

             Ală cau geh đảng kis tàm ƀòn Đăk Ung, xã Đăk Nhoong sùm lam lài tàm aloă broă lơh tàm ƀòn

Đăk Glei là dùl tàm pe kơnhoàl geh broă lơh sa mpồl bơtiàn gơtìp kal ke ngan càr Kon Tum dê, gùt kơnhoàl geh mờr 90% khà kờp làng bol là kòn cau. Kơnờm mờ broă lơh niam broă bơ̆t bơtàu đảng tàm tiah làng bol kòn cau, tus tŭ do kơnhoàl geh rơlao 2 rơbô 700 nă cau geh đảng, tàm hơ̆ geh mờr 1 rơbô 800 nă cau geh đảng là kòn cau, geh rơlao 66%.

Ồng A Phương, Phó Ƀí thư Huyện ủy Đăk Glei pà git, Huyện ủy geh sền gròi ngan, drơng gàr, tơnguh mpồl Đảng mờ tơnguh bơtàu cau geh đảng tàm ală ƀòn. Bơh ală broă lơh tàm ală xã di tŭ gŏ, bơto bơtơl cau geh pơnrơ jăk nàng tơmŭt bal tàm mpồl cau geh Đảng bal mờ hơ̆ là geh nùs nhơm pin dờn, nùs nhơm niam bơh làng bol kòn cau dê gơwèt mờ Đảng: “Bol añ tam pà bal mờ ală kwang bàng là Thường vụ Huyện ủy, hơ̆ sồng kấp ủy drơng broă tàm xã mù tus nàng git ală bơta hơ̆ sồng bơto sồr, sền gròi ală làng bol jăk chài kòn cau. Cau geh đảng là ală cau lam bồ, là ală cau lơh broă lam lài nàng làng bol in. Broă mờ lơh ngan mŭt Đảng, tàm hơ̆ uă ngan là tiah pôs đồng kăc màng kờñ mŭt Đảng nàng drơng broă làng bol in, drơng broă ƀòn lơgar, dà lơgar in tài mè bèp lài do kung là cau neh tus bal lơh broă mờ kăc màng”.

Mờ broă broă lơh bè gŏ cau geh pơnrơ jăk nàng bơto bơtơl; broă lơh di tŭ sră nggal cau dan mŭt tàm mpồl Đảng; bơyai lơh pờ ơdŭ bơto bơtơl kờñ git bè Đảng jăt mpồl xã..., tàm tơngai bơh nam 2015 tus 2020, Đảng ƀộ kơnhoàl Đăk Glei neh tơmŭt geh 700 nă cau geh đảng pa, sơrlèt 200 nă cau geh đảng pơn drờm mờ jơnau kờñ geh ai. Tàm nam sơnrờp lơh jăt Nghị quyết, kơnhoàl Đăk Glei neh tơmŭt geh 143 nă cau geh đảng pa. Pin dờn tàm tơngai lơh broă do, Đảng ƀộ kơnhoàl Đăk Glei geh pơn jăt tai lơh geh mờ sơrlèt mờ jơnau kờñ bơh broă tơnguh bơtàu Đảng, tàm hơ̆ geh jơnau kờñ tơnguh bơtàu cau geh đảng kòn cau. Mùl màl pà gŏ, ală cau geh đảng kòn cau tàm kơnhoàl Đăk Glei, càr Kon Tum là ală cau lam lài tàm broă tơnguh bơtàu lơh sa mpồl bơtiàn, bơ̆t bơtàu tiah nhàr dà lơgar ngai sơlơ kơ̆ kơl jăp mờ tơnguh bơtàu.

Cau cih Khoa Điềm-Cau mblàng Ndong Brawl