VOV4.K’ho- Ngai 04/05, Ƀộ Giáo dục mờ Đào tạo pơyoa kông điện tus Kwang atbồ ală Sở Giáo dục mờ Đào tạo in bè broă tơnguh broă lơh rcang sơndră chơ̆t bŭ dà ai kơnòm dềt mờ kơnòm bơsram in.

Kông điện bơh Ƀộ Giáo dục mờ Đào tạo sồr ală Sở Giáo dục mờ Đào tạo pơn jat tai sền mblàng yal mờ lam lơh geh cồng nha ală sră nggal đơng lam bơh Thủ tướng Cíñ phủ, Ƀộ trưởng Ƀộ Giáo dục mờ Đào tạo dê bè rcang sơndră rềs àr sồt să, chơ̆t bŭ dà gơwèt mờ kơnòm dềt mờ kơnòm bơsram. Ală Sở pờ dơ̆ lơh uă lam lơh broă lơh mblàng yal, bơto bơtê tơnguh uă bơta gĭt wă,  bơta wă wờng nàng kơnòm bơsram in  gĭt mờ lơh jat ală jơnau sồr bè broă lơh rcang sơndră chơ̆t bŭ dà, ngan là sền gĭt ală tiah geh pơhìn gơbàn chơ̆t bŭ dà; lam lơh, bơto pơlam broă yal tơngĭt bơta gĭt wă, bơta chài rcang sơndră chơ̆t bŭ dà tus tơl hìu bơsram, ơdŭ bơsram lài mờ tŭ kơnòm bơsram ơm rlô bơkang; lơh pràn srơh bơtê re dà, bơtê bơta chài ờdo ờdă ai kơnòm bơsram tàm hìu bơsram in. Sồr tơnguh rlau tai broă lơh pơgồp bal đah hìu bơnhă mờ hìu bơsram, mpồl cau  mờ gơnoar atbồ ală tiah nàng atbồ, jat sền kơnòm bơsram tàm tơngai ơm rlô bơsram, ơm rlô bơkang, gàr niam bơta ờdo ờdă, rcang sơndră chơ̆t bŭ dà.

Cau mblàng K’Hạnh