Kung bè ờs, pah dơ̆ kàl prang dờng tus bè tŭ do, rơndeh pơn diang tào geh tơrgùm jăt sèng pơrgan jòng tàm ƀlàng hìu măi Sơdàng An Khê, ha là Hìu măi Sơdàng A Yun Pa, càr Gia Lai. Mơya is mờ ală nam, nam do ală rơndeh pơn diang tào tŭ mŭt tus ală hìu măi do ndrờm geh ơm niam. Ală cau tờm rơndeh neh git rơndăp tào niam, ndrờm bal tàm thùng rơndeh. Uă rơndeh pơn diang uă, ñjơ̆ geh pơn diang di mờ jơnau geh ai nàng gàr niam lơngăp lơngai gùng lòt tàm ală gơl gùng geh tiah tam tào bơh ală hìu măi sơdàng dê.

Ồng Lương Tuấn Thông, Phó Kwang atbồ Kỹ thuật lơh Hìu măi Sơdàng A Yun Pa pà git, nam do broă sền gròi pơn diang uă ir, ñjơ̆ ir geh lơh nền nòn ngan bơh tàm broă sền nàng git tus mờ broă sền gròi tàm gùng lòt. Nàng pơgồp bal bơta pràn bal mờ ală mpồl lơh broă geh gơnoar, đah hìu măi sơdàng neh geh ală broă lơh tơbơl priă pơn diang gơwèt mờ ală bơta rơndeh pơn diang di bơta ñjơ̆. “Tŭ do, kông ty neh geh gùng dà broă lơh jăt kơrnoăt tàm adăt boh lam, neh yal mblàng gơwèt mờ ală rơndeh pơn diang nàng broă pơn diang geh lơngăp lơngainàng drơng tàm broă lơh hìu măi in. Kông ty kung lơh broă bal mờ rơndeh pơn diang, gơwèt mờ ală rơndeh pơn diang 17 tấn (di mờ khà ñjơ̆ geh ai) den kông ty geh bơtơl bơta ñjơ̆ 8% nàng gàr priă geh ai rơndeh pơn diang làng bol in. gơwèt mờ ală rơndeh pơn diang uă ir den kông ty ờ dờp mờ geh lơh sră nggal”.

Jăt cau măi rơndeh Nguyễn Đình Khang, cau neh uă nam pơn diang tào ală hìu măi sơdàng tàm càr Gia Lai in, nam do uă cau măi rơndeh rơwah pơn diang tào tơnguh dơ̆ pơn diang, ala mờ broă pơn diang uă ir ờ di mờ kơrnoăt geh ai tài khà priă lơh glài tus mờ broă lơh tìs do uă ngan. “Tŭ tus tàm bồ kàl tơnhào tào, mpồl lơh broă geh gơnoar yal mblàng bè broă pơn diang uă ir, cau măi rơndeh kung hơ pơn diang di mờ jơnau neh sồr bơh mpồl lơh broă geh gơnoar dê”.

Trung tá Lê Công Ngọc, Kwang atbồ Mpồl kảñ sát sền gàr gùng lòt sồ 01, Cơl dŭ lơh broă Kảñ sát sền gàr gùng lòt, Kwang àng càr Gia Lai pà git: Bơh bồ kàl tơrdih tào tus tŭ do, mpồl neh lơh glài rơlao 100 nă cau. Tŭ do, ală tiah tam tào tàm càr Gia Lai kung gam git nđờ rơhiang rơbô tấn tàm suơn, den tàng mpồl lơh broă kung gam pơn jăt tai lơh pràn ală broă sền gròi bơta ñjơ̆ rơndeh. “Tàm kàl tơnhào tào 2022-2023, Cơl dŭ lơh broă Kảñ sát sền gàr gùng lòt, tus tơn là Mpồl sồ 01, drơng broă lơh tàm gùng 25 neh kĭ hơ bal mờ 157 nơm rơndeh tus bal pơn diang tào sơdàng tus tàm hìu măi A Yun Pa. Cơl dŭ lơh broă kảñ sát sền gàr gùng lòt neh pơgồp bal mờ 5 kơnhoàl geh tiah tam tào, pah poh, bol añ geh pơgồp bal tơn mờ ală kơnhoàl nàng bơsong bè broă pơn diang uă ir”.

Kờñ tơnguh uă broă sền gròi, jăt sền ală rơndeh geh tơngŏ pơn diang uă ir, Tổng kụk Gùng lòt ù gờl Việt Nam neh sồr ală Sở Giao thông Vận tải, ală Kụk Atbồ lòt gùng ù gờl đơng lam mpồl lùp sền tàm gùng lòt ngui phan geh kŭp rùp nàng kŭp wơl rùp, bơh tŭ hơ̆ geh lơh glài “tơnơ̆” ală rơndeh lơi tìs. Cíñ phủ kung neh tơlik Nghị định sồ 123, tàm hơ̆ geh tơnguh khà priă lơh glài mờ rơndeh lơi gơtìp tìs pơn diang uă ir.

Đại tá Đỗ Thanh Bình, Phó Kwang atbồ Kụk Kảñ sát sền gàr gùng lòt đơs là, nàng lơh glài nền nòn bơta do pal ai gŏ loh kơnòl bơh anih lơh broă atbồ lơngăp lơngai rơndeh, pal lơh nền nòn tơngu me do: “Bol añ geh hòi jà uă ngan mpồl lơh broă mờ tam pà kấp loh làng, tus tơl mpồl lơh broă bè: Kụk Kảñ sát sền gàr gùng lòt kong kơnòl tus tàm bơta lơi, Cơl dŭ lơh broă kảñ sát sền gàr gùng lòt kong kơnòl tus bơta lơi, kwang atbồ kwang àng kơnhoàl kong kơnòl tus bơta lơi mờ broă pơgồp bal bơh kwang àng xã tàm broă lùp sền nàng ai gŏ ală rơndeh, ală tiah, ală mpồl lơh gơtìp pơn diang uă ir mờ lơh glài nền nòn. Ƀộ kwang àng neh lơh broă mờ Ƀộ Giao thông nàng git loh kơnòl tàm broă atbồ niam kỹ thuật rơndeh, ờ lời rơndeh sền nàng git dùl bơta, tơnơ̆ mờ hơ̆ lik lơh broă den gơs thùng ờ di bơh rơndeh dê tai mờ ờ geh cau lơi kong kơnòl bè bơta tờm bơh broă pơn diang uă ir hơ̆ là lơh thùng dờng”.

Nàng tơnguh broă sền gròi bơta ñjơ̆ rơndeh tàm tơngai tus, Ƀộ Giao thông Vận tải neh tơlik sră nggal pơyoa tus ală anih lơh broă, mpồl lơh broă tàm gah do nàng lơh jăt broă rơndăp lơh sền gròi, jăt sền bơta ñjơ̆ rơndeh tàm gùt lơgar.