VOV4.K’ho- Pa do, tàm Hà Nội, Ƀan Cấp hàñ Đảng Kộng sản Việt Nam, Quôk hội, Củ tịc lơgar, Cíñ phủ, Ủy ƀan Mặt trận dà lơgar Việt Nam neh yŭ rơyùm bơyai lơh tơngkah kir sơnrai 60 nam Ngai lơh git gơp cribơyai broă mờ lơgar ndai mờ 45 nam Ngai kĭ Hiệp ươk lơh bơyô mờ lơh broă bal Việt Nam- Lào.

 Kah wơl jơnau kir sơnrai bè git gơp lơh bơyô kuơmàng đah Đảng, Dà lơgar mờ Làng bol bàr lơgar Việt Nam- Lào, Tổng Ƀí thư ồng Nguyễn Phú Trọng đơs loh, tềng đap bơta đơng lam bồ bơh Đảng Kộng sản Việt Nam mờ Đảng Làng bol kac màng Lào dê, làng bol bàr lơgar neh bal mờ gơp lòt bal bơh ală ngai sơn rờp bềng bơta lòng, kal ke sền gàr mờ bơt bơtàu dà lơgar xã hội củ nghĩa tàm tơl lơgar. 

Tổng Ƀí thư ồng Nguyễn Phú Trọng đơs tàm dơ̆ bơyai lơh

Bàr Đảng, bàr dà lơgar neh tàm dong kờl bal mờ gơp, hời rơhời bơtàu tơnguh wơl lơh sa- mpồl bơtiàn tơnơ̆ rài tam lơh, mờ kung hời rơhời bơt bơtàu mờ bơtàu tơnguh git gơp lơh broă bal tàm ală gah kuơmàng bè lơh sa, niam chài, mpồl bơtiàn, bơto bơtê mờ bơsram, sền gàr dà lơgar, sền gàr lơngăp lơngai mờ lơh broă mờ lơgar ndai.

Tổng Ƀí thư ồng Nguyễn Phú Trọng đơs nền, tềng đap bơta sòl pơnđàng bơh Củ nghiã Mác- Lênin, bồ tơngoh Hồ Chí Minh tàm lơgar Việt Nam mờ bồ tơngoh Cay-xỏn Phôm-vi-hản tàm lơgar Lào dê, bàr Đảng, bàr dà lơgar pơn jat tai lòt bal mờ gơp tàm broă lơh tam gơl pa, lơh geh ală cồng nha kuơmàng ngan tàm bơtàu tơnguh lơh sa- mpồl bơtiàn, gàr kơ̆ kơljap cíñ trị, sền gàr lơngăp lơngai, ờdo ờdă mờ ring niam mpồl bơtiàn, cèng wơl rài kis ngai sơlơ hờm ram mờ ring lơngai ai làng bol tơl lơgar in: “Sền wơl ală gơl gùng kah yau khin cha jak chài mờ bàr jơi bơtiàn neh lòt gan, bol hi geh gơnoar pơn iờ să bè git gơp niam ngan, sàng goh, jơh nùs đah bàr Đảng, bàr dà lơgar mờ làng bol bàr lơgar Việt Nam mờ Lào. Git gơp kuơmàng đah Việt Nam mờ Lào neh geh ală Kwang đơng lam bồ dờng màng là Củ tịc Hồ Chí Minh, Củ tịc Cay-xỏn Phôm-vi-hản mờ Củ tịc Xu-pha-nu-vông lơh bơnàng jă tơn, geh lời uă tŭ tơngai nàng bơt bơtàu, sền gàr, bơtàu tơnguh mờ dà kơl hề, bơta pràn mờ jơh bal ntìng mhàm bơh ală rơnàng ling klàng mờ làng bol bàr lơgar dê; ngan ngồn gơ gơs jơtài kuơmàng, git gơp geh dùl ờ geh bàr tàm kah yau dunia”.

Ồng Bounthong Chitmany, Ủy viên Ƀộ Cíñ trị, Phó Củ tịc lơgar Lào geh jơnau đơs

Jat Tổng Ƀí thư ồng Nguyễn Phú Trọng đơs, git gơp lơh broă bal đah bàr Đảng, bàr dà lơgar Việt Nam mờ Lào pơn jat tai bơtàu tơnguh kơ̆ kơljap, ngai sơlơ bơtàu tơnguh tơl làm tàm jơh ală bơta mờ geh cồng nha, pơn rơ là git gơp cíñ trị ngai sơlơ geh lơh kơ̆ kơljap mờ bơtàu tơnguh, bơh “git gơp lơh bơyô ờs mờng” gơ gơs “git gơp lơh bơyô dờng màng” bơh nhai 02 nam 2019, ngai sơlơ gơ gơs pin dờn rềp mềr, pơn jat tai dong pơlamgùng dà ai ală gah lơh broă bal ndai in; Lơh broă bal sền gàr dà lơgar- sền gàr lơngăp lơngai pơn jat tai là dùl tàm ală tơngume tờm kuơmàng ngan rlau jơh tàm git gơp kuơmàng đah bàr lơgar. Lơh broă bal lơh sa pơn jat tai geh sền gròi bơtàu tơnguh mờ neh lơh geh uă cồng nha niam, cèng wơl bơta kuơ ngan ngồn ai làng bol mờ mpồl lơh sa kă bro bàr lơgar in; Lơh broă bal bè bơto bơtê mờ bơsram- do là gah lơh broă bal kuơmàng đah bàr lơgar, kung bè lơh broă bal niam chài, lơh sơnơm, gùng lòt pơndiang phan, năng lượng ngai sơlơ geh lơh kơ̆ kơljap mờ bơtàu tơnguh. Git gơp đah ală càr, ngan là đah ală càr rềp gùng nhàr bàr lơgar ngai sơlơ gơ gơs rềp mềr ngan.

Tổng Ƀí thư ồng Nguyễn Phú Trọng kung đơs là, tàm tŭ tơngai broă tàm dunia mờ tàm tiah do gam geh ală bơta gơlik geh mhar ngan, kal ke mờ ờ gơtùi git lài; kòn bơnus dunia gam pal kong mờ uă bơta lòng dờng bè tam lơh dờng, tàm pơrlòng kal ke ngan đah ală lơgar dờng, ală broă sền gàr lơngăp lơngai ờ ờs mờng bè kòp bơtờp, ờ tơl năng lượng, phan sa; bàr Đảng, bàr dà lơgar mờ làng bol bàr lơgar sơlơ pal tam klac bal, rềp mềr, sơlơ tơnguh lơh broă bal rlau tai nàng bal mờ gơp sơrlèt gan tơl bơta kal ke, pơn jat tai kơ̆ dơn jat jơnau kờñ lơngăp lơngai is jơi bơtiàn mờ củ nghĩa xã hội, bal mờ gơp lơh jơh pràn nàng sền gàr mờ ngai sơlơ bơt bơtàu ai git gơp lơh bơyô dờng màng, tam klac kuơmàng mờ lơh broă bal tơl làm đah Việt Nam- Lào: “Đảng, dà lơgar mờ làng bol Việt Nam sùm dong kờl pràn kơldang, tơl làm broă lơh tam gơl pa bơh lơgar Lào dê; mờ kung jơh nùs ki ngàm mờ lời ai lài ngan ai git gơp kuơmàng ờ mìng là cau ling bal mờ gam là oh mi đah bàr Đảng, bàr dà lơgar bol he dê. Bol hi sùm kờñ lơh broă bal, dong kờl dà lơgar Lào mờ nùs nhơm “dong bơyô là dong he”, sền do là kơnòl kuơmàng jŏ jòng; kơp kờñ bal mờ Đảng, dà lơgar mờ làng bol lơgar Lào ngai sơlơ tơnguh bơta pin dờn cíñ trị, tơnguh lơh broă bal sền gàr lơngăp lơngai, sền gàr dà lơgar, sơlơ tơnguh bơta tàm tơrbŏ bal bàr rài lơh sa, ngai sơlơ tơnguh cồng nha lơh broă bal bơto bơtê mờ bơsram, bal mờ gơp bơt bơtàu rài lơh sa is, lơh tờm is, mut gơ rờm bal jrô ơnàng; bal mờ gơp lơh ngan nàng ală cồng nha lơh broă bal ngai sơlơ dipal mờ bơta kuơ bơh git gơp dờng màng Việt Nam- Lào dê”.

Đơs tàm dơ̆ bơyai lơh, ồng Chít-mạ-ni, Ủy viên Ƀộ Cíñ trị, Thường trựk Ƀan Ƀí thư Đảng Làng bol kac màng dà lơgar Lào, Phó Củ tịc lơgar Lào đơs nền, Đảng, Dà lơgar mờ Làng bol lơgar Lào sùm cih kah mờ git ưn ngài uă ngan gơ wèt mờ Củ tịc Hồ Chí Minh dờng màng, Củ tịc Cay-xỏn Phôm-vi-hản mờ Củ tịc Xu-pha-nu-vông kờñ gơboh là cau bơt bơtàu mờ là krơh niam àng gơ crà ngan tàm broă sền gàr, bơtàu tơnguh git gơp lơh bơyô dờng màng, tam klac bal kuơmàng mờ lơh broă bal tơl làm đah bàr lơgar Việt Nam- Lào gơ gơs là jơtài bal kuơmàng, là bơta pal jat kis gơs mờ bơtàu tơnguh bơh bàr lơgar dê, là dùl tàm ală bơta lơh nền tus cồng nha bơh kac màng tơl lơgar dê: “Đảng, Dà lơgar mờ Làng bol lơgar Lào bol hi sùm kơ̆ dơn mờ sền do là kơnòl he dê tàm broă gàr niam bơhiàn git gơp lơh bơyô kuơmàng, tam klac kuơmàng mờ lơh broă bal tơl làm Lào- Việt Nam geh sơrlèt gan git nđờ bơta lòng mờ lời uă tŭ tơngai bơt bơtàu mờ dà kơl hề, ntìng mhàm bơh ală cau ling khin cha jak chài dê kung bè làng bol lơgar Lào mờ làng bol Việt Nam dê git nđờ rnàng nàng sùm sùm geh kis sùm; cèng wơl bơta kuơ ngan ngồn uă ngan rlau jơh ai làng bol bàr lơgar in, nàng di mờ jơnau nrĭ gam sùm bơh Củ tịc Cay-xỏn Phôm-vi-hản: “Bơnơm digơlan siar, dà dờng digơlan soat, mơya nùs nhơm đềt mềr đah Lào- Việt Nam sùm sùm kơ̆ kơljap rlau mờ bơnơm, rlau mờ dà dờng”.

Mờ jơnau nrĭ gam sùm bơh Củ tịc Hồ Chí Minh dê:

“Tàm kờñ den nđờ bơnơm kung hàu sơl

Nđờ dà dờng kung tiă, nđờ kuèl kơh kung guh jai sơl

Việt Nam- Lào bàr lơgar bol he

Nùs nhơm niam jrô rlau mờ dà Hồng Hà- Cửu Long”.

Cau mblàng K’Duẩn