VOV4.K’ho- Broă lam lơh jat dơ̆ lam sồr “Cau Việt Nam ngui lài phan Việt Nam” tàm tơngai lài neh cèng wơl cồng nha ngan ngồn, bè bơt bơtàu ròt mpồl lơh bal lơh gơlik, tac phan Việt Nam kơ̆ kơljap; tơnguh khà phan Việt Nam geh bơta pràn tàm ală anih tac phan... Bơh hơ̆, pơgồp bơnah dong cau ngui sa geh ngui uă rlau tai phan bơna geh bơta niam.

Lam lơh jat dơ̆ lam sồr “Cau Việt Nam ngui lài phan Việt Nam”, tơngai lài, uă mpồl lơh sa kă bro tàm lơgar neh lam lơh uă broă lơh pơn jờng rề ơnàng broă lơh gơlik phan, ngui sa tàm lơgar; tơnguh khà phan lơh gơlik tàm lơgar, yal tơnggit phan bơna, mat kă bro; rề ơnàng drà kă bro, kuơmàng là tàm ală tiah ƀòn lơgar, tiah sar lơgar ngài. Bơh hơ̆, ai tơnggŏ niam gơnoar broă kuơmàng he dê tàm broă gàr niam broă lơh gơlik, tac phan bơna, broă drơng ala pal geh bè: kòi phe, phan sa...

Jat jơnau đơs bơh uă cau ngui sa dê, tŭ do phan Việt Nam gam ngai sơlơ geh rơ wah uă tài bơh khà priă ờ huan kas, dipal mờ bơta geh ngan priă jền bơh ală rơnàng làng bol tàm mpồl bơtiàn dê. Bal mờ hơ̆, bơta niam, rùp hin phan bơna ngai sơlơ geh tơnguh, li la bè ală bơta... Ală bơta phan geh cau rơ wah uă ngan rlau jơh là phan lơh gơs bơh suơn sre, phan soh, phan ngui sa. Ồng Chu Quang Hào, Kwang atbồ dờng Tổng Kông ty Bưu điện Việt Nam pà git, bơh nam 2019, Tổng kông ty neh bơcri priă mờ lam lơh broă tac bro tàm điện tử Postmart.vn nàng kờñ tơnguh broă ngui sa gơ wèt mờ phan tàm lơgar lơh gơlik. Mìng is nam lài, kờp jơh broă kă bro lơh geh 120 tơmàn đông, neh tac bro geh rlau 100 rbô tấn phan lơh gơs bơh suơn sre jat kàl ai làng bol lơh broă sa tàm uă càr, ƀòn dờng tàm gùt lơgar in bè: Bắc Giang, Lào Cai, Bến Tre... bal mờ uă ngan càr, ƀòn dờng ndai, neh cèng wơl cồng nha niam ngan tàm broă tac phan lơh gơs ai làng bol lơh broă sa mờ uă mpồl lơh sa kă bro tàm gùt lơgar in: “Hơ̆ là ală tềl lời wơl sơn rờp, kuơmàng bơh broă kă bro tàm điện tử bơh Postmart bơh Ƀưu điện Việt Nam dê neh lơh gơtùi tàm 2 nam do tŭ kòp Kovid-19 bơtờp uă. Tŭ do, mờ kơnòl broă geh Cíñ phủ, Ƀộ Thông tin mờ Truyền thông jàu hơ̆ là bơt bơtàu mờ lam lơh broă kă bro tàm điện tử bơh Postmart dê gơ gơs broă kă bro mìng phan Việt Nam, nàng ai jơh phan lơh gơs bơh suơn sre bơkah ală ù tiah dê kung bè ală phan bơna lơh gơlik tàm Việt Nam mut tàm anih kă bro điện tử”.

Jat Thứ trưởng Ƀộ Kông thương ồng Đỗ Thắng Hải đơs, tŭ do khà phan Việt Nam tàm ală siêu thị, anih tờm kă bro neh gơguh tus bơh 80 tus 90%, mìng is khà phan Việt Nam tàm ală siêu thị Go bơh Tập đoàn Central Retail dê neh gơguh bơh 94 tus 96%; tàm drà ờs mờng geh bơh 60 tus 70%... Bè hơ̆, dơ̆ lam sồr loh làng neh cèng wơl cồng nha dờng ngan. Thứ trưởng ồng Đỗ Thắng Hải kung pà git, nàng pơn jat tai lơh jat dơ̆ lam sồr tàm tơngai tus, Ƀộ Kông thương neh bơt bơtàu mờ geh Thủ tướng Cíñ phủ ring bal rơndap broă lơh bơtàu tơnguh drà kă bro tàm lơgar gơ jat bal mờ dơ̆ lam sồr Cau Việt Nam ngui lài phan Việt Nam tơngai bơh nam 2021 tus nam 2025. Rơndap broă lơh geh kuơ niam ngan tàm broă gàr niam rài kis bơh làng bol dê, gàr sùm bơtàu tơnguh lơh sa- mpồl bơtiàn kơ̆ kơljap tềng đap tŭ tơngai gam geh uă tam gơl bè tung lơtang lơh sa tàm dunia, bơta lòng bơh mut gơ rờm bal mờ gơ rềng bơh kòp Kovid-19 dê: “Tàm rơndap broă lơh do wèt tus jơnau kờñ pơgồp bơnah bơtàu tơnguh drà kă bro tàm lơgar, lam lơh geh cồng nha ală anih tac phan. Bơh hơ̆ lơh gơs ală ròt bơta kuơ ală mpồl lơh gơlik, tac phan geh niam sùm, lơh gơlik bơta lơh bal kơ̆ kơljap đah ală mpồl, ală cau tờm lơh gơlik phan tàm drà kă bro mờ gơp bơh cau lơh gơlik tus cau ngui sa bơh dà lơgar tus kâp hơ đơm, bơh mpồl lơh sa kă bro mờ tus ală anih atbồ dà lơgar nàng kờñ ai phan bơna geh bơta niam uă bơh uă tiah krơi is tus tàm tê cau ngui sa tàm ƀòn lơgar mờ gơ hòi gơ jà phan bơh suơn sre, ngan là phan bơkah tàm ƀòn lơgar tus mờ ală càr, ƀòn dờng”.

Nàng pơn jat tai sơlơ tơnguh dơ̆ lam sồr “Cau Việt Nam ngui lài phan Việt Nam” kung bè nàng phan Việt Nam ngai sơlơ ai geh bơta pin dờn bơh cau ngui sa tàm lơgar dê uă rlau tai, ală mpồl lơh sa kă bro pal sơlơ tơnguh broă bơt bơtàu mat kă bro, tam gơl pa, bơceh pa bơcri priă blơi phan bơna, măi mok pa nàng tơrmù khà priă phan lơh gơs, tơnguh bơta pràn jak tàm pơrlòng. Tơnguh rlau tai broă rề ơnàng bơta lơh bal kă bro, lơh bal crơng gơs tus bal tàm ală ròt broă lơh... nàng phan bơna, broă drơng ala ngai sơlơ niam rlau.

Cau mblàng K’Duẩn