VOV4.K’ho - Poh lài, Đoàn ơruh pơnu Kộng sản Hồ Chí Minh dà lơgar neh bơyai lơh tơn jơh broă lơh Nhai ơruh pơnu nam 2022. Mờ tơngu me “Cau kơnòm să bơceh lơh”, broă lơh nhai ơruh pơnu nam 2022 neh geh ală kấp đoàn lơh uă, hòi jà geh gal đoàn viên, ơruh pơnu, kơnòm pa tào mờ kơnòm dềt tus bal. Uă gùng dà broă lơh pa, bơceh lơh tàm broă bơyai lơh ală broă, broă lơh tàm Nhai ơruh pơnu geh tam pà, lơh uă di tŭ, geh cồng nha tàm gùt đoàn bơh ală poh lơh jăt broă lơh.

Nhai Ơruh pơnu nam 2022 mờ tơngu me “Cau kơnòm să bơceh lơh” neh geh 67 tàm 67 tỉñ, thàñ đoàn mờ đoàn gơwèt bal tus bal, hòi jà mờr 28 rơbô nă đoàn viên, ơruh pơnu, lơh jăt ală broă lơh dờp bal mờ kờp jơh bơta pràn hòi hà geh mờr 68 tơmàn đong. Broă đơng lam lơh jăt ală broă lơh Nhai ơruh pơnu nam 2022 geh lơh di tŭ, lơh ndrờm bal bơh Dà lơgar tus ală tiah.

                                             Pơrjum tơn jơh Nhai ơruh pơnu nam 2022

Ală broă lơh geh lơh jăt ƀuơn tàm nùs nhơm ơruh pơnu gùt lơgar bơyai lơh ală broă tơnkah 91 nam ngai crơng gơs Đoàn ơruh pơnu Kộng sản Hồ Chí Minh, bơyai lơh pơrjum dờng Đoàn ală kấp wèt tus Pơrjum dờng Đoàn gùt lơgar dơ̆ XII; lơh jăt nền nòn jơnau đơng lam bơh Đảng, Dà lơgar, Cíñ phủ bè broă rơcang sơndră mờ kòp kovid-19; di tŭ, ndrờm bal nàng lơh geh ală broă bơceh lơh tàm broă lơh jăt broă lơh, di pal mờ bơta gơlik geh bơh kòp gơtờp.

Uă gùng dà broă lơh, lơh pa, bơceh lơh tàm broă bơyai lơh ală broă, lơh jăt tàm Nhai ơruh pơnu geh tam pà bal, lơh geh uă mờ di tŭ, geh cồng nha tàm gùt đoàn bơh ală poh lơh jăt broă lơh. Mpồl đoàn viên, ơruh pơnu tus bal ală broă lơh tàm Nhai ơruh pơnu geh gal ơruh pơnu tus bal uă bơta.

Bơdìh kờ cồng nha neh lơh geh, geh ờ uă broă lơh ờ hềt tơrgùm lơh jăt, ờ hềt geh cồng nha jăt mờ rơndăp broă Nhai ơruh pơnu nam 2022, bè: Broă pơgồp bal bơto pơlam lơh broă mờ ai broă lơh ơruh pơnu bơh ală kấp, Ƀộ, Đoàn gam ờ pràn, ờ hềt geh tam gơl pa; Ờ geh uă broă lơh, lơh geh cồng nha tàm broă dong kờl tam gơl số, ngui kông nghệ tàm broă lơh sa suơn sre; lơh jăt broă lơh cau ngăc ngar kơnòm să tus bal is tàm broă bơ̆t bơtàu wơl lơh sa suơn sre gam ờ pràn; broă crơng gơs, lơh jăt mpồl lơh broă ngui kông nghệ sinh học ttàm broă sền gàr tiah kis kung ờ hềt cèng geh cồng nha uă.

                   Ơruh pơnu càr Dăk Lăk tus bal dong kờl ală broă lơh tàm rài kis mpồl bơtiàn

Tàm dơ̆ tơn jơh, uă jơnau đơs bơh ală tỉñ, thàñ đoàn ai geh ală jơnau nàng tơnguh uă bơta niam broă Đoàn tàm tơngai tus. Thiếu tá Bạch Quốc Tuyên, Phó Ƀí thư Đoàn ơruh pơnu Ƀộ kwang àng geh jơnau đơs: Gơwèt mờ broă 5 lam lài, tơnguh bơtàu lơh sa mpồl bơtiàn, sền gàr dà lơgar, pal pơgồp bal broă lơh mờ ală càr, ƀòn dờng, geh sùm cồng nha broă lơh ơruh pơnu tus bal sền gàr tiah nhàr dà lơgar: “Bơdìh mờ broă he sùm bơyai lơh nhai 3 tiah nhàr dà lơgar den he gơtùi kơlôi sơnơng lam sồr broă lơh jŏ jòng rơlao. Bè rơwah nam ai là nam ơruh pơnu Việt Nam mờ tiah nhàr dà lơgar, tiah bồt dà lềng, den he tơrgùm geh uă bơta pràn rơlao, uă broă lơh rơlao tus bal tơnguh bơtàu lơh sa mpồl bơtiàn tiah nhàr dà lơgar. Dơ̆ bàr, bol añ sồr ală tỉñ, thàñ đoàn pơn jăt tai pơgồp geh cồng nha mờ mpồl ơruh pơnu kwang àng tàm broă bơyai lơh broă lơh bè tiah nhàr dà lơgar, tiah bồt dà lềng. Bol añ kơ̆p kờñ geh broă pơlam mờ ƀan ƀí thư Đoàn ơruh pơnu dà lơgar tơlik kơrnoăt pơgồp bal đah Đoàn ơruh pơnu kwang àng mờ ală tỉñ, thàñ đoàn bơto sồr broă lơh ơruh pơnu kwang àng mờ ală tỉñ, thàñ đoàn kung bè kơrnoăt pơgồp bal đah tam pà bơyai lơh ală broă lơh tàm ƀòn ơm kis tàm ală tỉñ, thàñ đoàn”.

Đơs tàm pơrjum, bi Nguyễn Anh Tuấn, ƀí thư dơ̆ 1 Đoàn ơruh pơnu Kộng sản Hồ Chí Minh dà lơgar đơs niam ală broă lơh mờ cồng nha mờ ală tỉñ, thàñ đoàn tàm gùt lơgar neh lơh geh tàm Nhai ơruh pơnu, tàm hơ̆ geh broă dờp bal bơh ƀộ, gah lơh broă dà lơgar, gơnoar atbồ ală càr, ƀòn dờng, làng bol, ai geh nùs nhơm pơrlòng tơrgùm ai broă bơyai lơh pơrjum dờng đoàn ală kấp; uă tơngu me kal ke tàm Nhai ơruh pơnu, mơya kung gam geh lơh jăt. Mơya, uă broă ờ hềt lơh geh, gam gơtìp lời ing, pal sền wơl bè broă pơlam, đơng lam. Bi Nguyễn Anh Tuấn sồr: “Broă lơh mờng chài mờ he geh bơh broă đơng lam Nhai ơruh pơnu là broă lơh bal đah ală ƀộ, gah lơh broă dà lơgar pal niam. Tàm ală càr lơh kung niam, tàm hơ̆ uă ngan là nam do là nam sơn đờm geh adăt ơruh pơnu geh ngui. Nhai ơruh pơnu geh broă cri bơyai đah cau lam sồr gơnoar atbồ mờ ơruh pơnu. Ală kwang bàng pơlam broă lơh do niam ngan mờ bơh broă cri bơyai do hơ̆ sồng geh kơ cế, broă lơh, tơlik ală jơnau pơlam bè đah broă lơh nàng Ủy ƀan jào kơnòl ai broă lơh ơruh pơnu in. Añ kung kơ̆p kờñ do là broă mờng chài mờ he geh tơnguh niam rơlao tàm tơngai tus, tàm hơ̆ uă ngan là tàm broă rơcang ai pơrjum dờng mờr tus in”.

Cau mblàng Ndong Brawl