VOV4.K’ho - Drim òr (15/09), tàm ƀòn dờng Dà Làc, càr Lâm Đồng, Ƀộ Văn hoá, Thể thao mờ Zu lịc bơyai lơh Pơrjum bơto adăt tam gơl, bơtơl ờ uă bơta tàm adăt ngui bơta ngăc ngar bè gơnoar cau cih, gơnoar gơrềng bal.

                Tơnguh uă bơta pràn atbồ, lơh jăt geh cồng nha gơnoar cau cih, gơnoar gơrềng bal

Rơlao 150 nă kwang bàng ala măt ală ƀộ, gah lơh broă gơrềng bal, ală mpồl lơh broă gơwèt Ƀộ Văn hoá, Thể thao mờ Zu lịc bal mờ ală càr, ƀòn dờng tus bal. Tàm tơngai 3 ngai, ală kwang bàng geh iăt ală tơngu me bè ală broă tam gơl, bơtơl bè gơnoar cau cih, gơnoar gơrềng bal di pal mờ broă tơrgùm bal dunia, broă tơnguh bơtàu lơh sa mpồl bơtiàn tŭ do mờ broă gơdờp bal mờ adăt boh lam gơrềng bal; yal ală tơngu me tam gơl, bơtơl bè gơnoar cau cih, gơnoar gơrềng bal tàm adăt tam gơl, bơtơl ờ uă bơta tàm adăt Ngui bơta ngăc ngar; sền kờl gơnoar cau cih tàm broă chồl pràn broă tơnguh bơtàu lơh sa mờ măi mŏk bơta chài rơgơi; ală bơta pa bè broă sền gàr gơnoar ngui bơta ngăc ngar, kơnòl adăt boh lam bè gơnoar cau cih, gơnoar gơrềng bal; yal ală tơngu me tờm bơh Hiệp ướk bè gơnoar cau cih bơh Mpồl ngui bơta ngăc ngar dunia, Hiệp ướk bè dơ̆ cih mờ jơnau kŭp săp bơh Mpồl ngui bơta ngăc ngar dunia dê.

Cau mblàng Ndong Brawl