VOV4.K’ho- Ngai do (19/5), tàm gùt lơgar geh lơh uă broă lơh tơngkah kir sơnrai 132 nam Ngai deh Củ tịc Hồ Chí Minh. Lài hơ̆, tàm poh lài, tàm Hà Nội geh lơh Pơrjum jak chài dà lơgar, ràng tơlik rùp mờ sră “Tơnguh uă nùs nhơm kac màng, tơn jơh bơta mìng git bơta kuơ is he dê mờ ờ kơlôi tus bơta kuơ mpồl bal jat nùs nhơm, niam chài, rài kis Hồ Chí Minh”. Ồng Võ Văn Thưởng, Ủy viên Ƀộ Cíñ trị, Thường trựk Ƀan Ƀí thư neh tus bal mờ đơng lam pơrjum. Bơh hơ̆, pơgồp bơnah lơh loh ală bơta kuơ jak chài- bơta kuơ ngan ngồn bơh nùs nhơm Hồ Chí Minh dê bè tơnguh uă nùs nhơm kac màng, tơn jơh bơta mìng git bơta kuơ is he dê mờ ờ kơlôi tus bơta kuơ mpồl bal.

Tŭ gam kis, Củ tịc Hồ Chí Minh là cau neh crơng gơs mờ pơlam tàp, tề lam Đảng he sùm lời ai bơta sền gròi uă ngan tus broă lơh bơt bơtàu Đảng, nàng Đảng he dê ngan ngồn sàng goh, pràn kơldang, kơ̆ kơljap, ngan ngồn là dùl Đảng kac màng song dơpă, là nùs nhơm, là bơta gơguh jak. Di tơngkah kir sơnrai 39 nam ngai crơng gơs Đảng (03/02/1969), Bác Hồ neh cih jơnau “Tơnguh uă nùs nhơm kac màng, tơn jơh bơta mìng git bơta kuơ is he dê mờ ờ kơlôi tus bơta kuơ mpồl bal”, đơs nền gơnoar broă đơng lam bồ bơh Đảng dê gơ wèt tus mờ kac màng Việt Nam mờ bơta pal geh pal tơnguh uă nùs nhơm kac màng gơ wèt tus mờ kwang bàng, đảng viên đơs bal, rơnàng cau kơnòm să đơs is. Mờ kung đơs tus ală tềl tơnggŏ, bơta aniai bơh bơta mìng git bơta kuơ is he dê mờ ờ kơlôi tus bơta kuơ mpồl bal dê mờ đơs tus 2, 3 broă lơh dră wơl bơta mìng git bơta kuơ is he dê mờ ờ kơlôi rơcang tus bơta kuơ mpồl bal... Rlau 50 nam tơnơ̆ tŭ crơng gơs, tus tŭ do, jơnau cih do kung gam bè ờs bơta kuơ gơ wèt tus mờ broă lơh bơt bơtàu, lơh niam wơl Đảng, gơ wèt tus mờ tơl nă kwang bàng, đảng viên. Jơnau cih là jơnau bơto pơlam lời wơl, là jơnau nting tơngkah mờ Bác Hồ neh lời wơl ai ală rơnàng kwang bàng, đảng viên in, pal sùm pơlam tàp, lơh ngan rơcang sơndră mờ tơn jơh bơta mìng git bơta kuơ is he dê mờ ờ kơlôi tus bơta kuơ mpồl bal nàng tơnguh uă nùs nhơm kac màng.

Jơh gùt anih pơrjum jak chài dà lơgar

Jat Giáo sư-Tiến sĩ Hoàng Chí Bảo, cau jak chài kâp dờng Họk viện Cíñ trị dà lơgar Hồ Chí Minh đơs, tàm jơnau cih “Tơnguh uă nùs nhơm kac màng, tơn jơh bơta mìng git bơta kuơ is he dê mờ ờ kơlôi tus bơta kuơ mpồl bal”, Bác Hồ neh tơrgùm uă ngan tàm broă đơs lah bơta mìng git bơta kuơ is he dê mờ ờ kơlôi tus bơta kuơ mpồl bal, Bác Hồ đơs loh “bol sò tơm tàm lơgar- hơ̆ là bol sò tơm tàm nùs gam ngòt rơngơt rlau mờ bol sò tơm bơh bơdìh”- do là ală jơnau đơs lài kràñ ngan bol he in tàm broă bơto pơlam, pơlam tàp nùs nhơm tus jơh rài kis: “Bác Hồ đơs lah jơh bal mờ ală cau geh nùs tồr pơ hề pơ hà, broă lơi kung kờñ bơto cau ndai in, hơ̆ là geh dùl êt cồng nha neh yal mờ Đảng, sồr Đảng pal sền kuơ bè lơi. Bác Hồ cih kràñ ngan, geh ală cau tài mìng git bơta kuơ is he dê, ờ kơlôi tus bơta kuơ mpồl bal mờ lơh Đảng gơ gơs dùl ntùng nàng hời rơ hời hàu tus bơta kuơ hàm kờñ. Ală cau gơ tŭp tŭ tơngai nùs nhơm is, broă dờng ờ gơtùi lơh, broă dềt den ờ lơh, bơsram den alah, lơh broă den lơyài, dut ndơl den lơh tìs kơrnuat bơh Đảng dê mờ tìs glài, gơ gơs dră wơl Đảng. Ală jơnau sền sơ wì mblàng lơh loh bè hơ̆ niam ngan neh rlau 50 nam lài, là dùl jơnau đơs lài kràñ ngan ai bol he in tàm broă bơto pơlam, pơlam tàp nùs nhơm jơh rài kis”.

Ală jơnau cribơyai tàm pơrjum neh lơh loh bè bơta kuơ bơh nùs nhơm Hồ Chí Minh dê tàm ròt ală nùs nhơm Hồ Chí Minh dê bè ală broă kuơmàng bơh kac màng Việt nam dê; gơnoar broă, bơta kuơ, bơnàng jă nùs nhơm tờm ngan bơh nùs nhơm Hồ Chí Minh dê gơ wèt tus mờ broă lơh bơt bơtàu Đảng đơs bal mờ broă lơh bơt bơtàu Đảng bè nùs nhơm đơs is bơh lài tus tŭ do mờ ai tŭ tơngai pa in; bơta gơ rềng đah nùs nhơm, niam chài, rài kis Hồ Chí Minh; mblàng lơh loh bơta gơ rềng đah jơnau kờñ bơta kuơ mờ jơnau kờñ nùs nhơm nàng gàr sùm bơta pràn ai bơtàu tơnguh in mờ gam dră wơl bơta mìng git bơta kuơ is he dê mờ ờ kơlôi tus bơta kuơ mpồl bal.

Koh ƀăng mut lơh ràng tơlik rùp

Ƀí thư Đảng ủy Khối ală anih lơh broă dà lơgar ồng Huỳnh Tấn Việt pà git, Pơrjum pơgồp bơnah tơnguh jơnau git wă mờ lơh loh rlau tai, niam rlau tai bè jơnau gơtha, bơta kuơmàng bơh nùs nhơm, niam chài, rài kis Hồ Chí Minh dê gơ wèt tus mờ broă lơh bơt bơtàu mờ lơh niam wơl Đảng. Mờ kung là tŭ nàng kah wơl mờ git uă rlau tai bè ală jơnau nting tơngkah bơh Củ tịc Hồ Chí Minh dê, mờ nàng kờñ kwang bàng, đảng viên in sền wơl să tờm he dê, nàng tơnguh ală bơta niam, bơsong ală bơta ờ niam, brồ guh dipal là cau duh broă làng bol dê bè Củ tịc Hồ Chí Minh neh geh tŭ nting tơngkah.

Ồng Huỳnh Tấn Việt đơs là, jơnau kờñ geh ai tơlik tàm tơngai tŭ do là tơl nă kwang bàng, đảng viên pal jơh nùs lơh jat kơnòl lơh krơh; cau geh kơnòl broă sơlơ dờng, gơnap gơnoar sơlơ dờng, ngan là cau atbồ ală anih lơh broă, mpồl lơh broă tàm Đảng mờ tàm Mpồl kwang bàng duh broă den pal sơlơ lơh krơh rlau tai tàm broă bơto pơlam, pơlam tàp nùs nhơm, niam chài rài kis, mờng quèng lơh broă nàng làng bol in đòm jat: “Git loh jơnau bơto tơngkah Bác Hồ dê, bol he pal kràñ cê, kơ̆ dơn mờ jơh nùs lơh sàng goh mpồl đảng viên, kơryan mờ tơrmù bơta sa kuề sa kuà, bơta gơ plơ̆ gơ huc bè nùs nhơm cíñ trị, rài kis bơh kwang bàng, đảng viên dê, bơta lơh gơlik is, tam gơl is tàm dơlam mpồl. Pơn jat tai ai broă bơsram mờ lơh jat nùs nhơm, niam chài, rài kis Hồ Chí Minh gơ gơs là broă lơh sùm, gơ gơs là dùl jơnau kờñ niam chài tàm Đảng”.

Đơs đơng lam Pơrjum, ồng Võ Văn Thưởng, Ủy viên Ƀộ Cíñ trị, Thường trựk Ƀan Ƀí thư đơs nền: Bơta tờm bơh bơt bơtàu Đảng bè nùs nhơm dê là lam lơh jat ngan ngồn nùs nhơm kac màng, đơs pal gơ jat bal mờ lơh, lam lơh ngan ngồn dùl rài cíñ trị sàng goh. Bơta mìng git bơta kuơ is he dê mờ ờ kơlôi tus bơta kuơ mpồl bal là bol sò tơm tàm nùs, den tàng kờñ dră wơl pal sơn đờm bơh bơt bơtàu, tàm hơ̆ bơta kuơ lơh nền là bơto pơlam, pơlam tàp, sền gròi bơta hàm kờñ, tơnguh pràn jak dră wơl bơta pơn jồ... Ồng Võ Văn Thưởng sồr ală anih lơh broă, mpồl lơh broă pal tơnguh kơrnuat pal jat, tơnguh nùs nhơm lơh jat kơrnuat tàm Đảng, tơnguh broă lơh sền sơ wì, jat sền, gơ jat bal mờ tam gơl pa broă lơh đơng lam bồ.... sơlơ tơnguh kơrnuat pal jat nàng rơ wah ală cau gơ plơ̆ gơ huc nùs nhơm, tam gơl nùs nhơm; lơh glài kràñ ală broă lơh tìs nàng pơhìn, tơngkah lài, đơs lài, geh bơta kuơ dong kờl ai broă lơh bơto bơtê nùs nhơm kac màng, tơnguh broă sền tìs di mờ sền tìs di is.

Cau mblàng K’Duẩn