5 gơl gùng lòt nhơl do tơrgùm tàm broă lơh ală tiah nhơl sền gơwèt Kông viên địa cất gùt plai ù UNESCO Dăk Nông mờ Tơnao dà Tà Đùng. Cau năc kờñ sền ù tiah niam mờ khin bơrnañ, gơtùi rơwah broă tus sền trồm rơgồng bơnơm ồs jòng ngan tiah đah jum măt tơngai lik câu Á tàm kơnhoàl Krông Nô dê, ha là ală ñrùh dờng ñhoa tàm dà dờng Srepok.

Kờp jơh geh 44 tiah lòt nhơl gơwèt Kông viên địa cất gùt plai ù UNESCO Dăk Nông geh tơrgùm, yal tàm ală pang internet nàng yal tus gal cau năc in. Cau năc kờñ bơta lơngăp lơngai, niam bơnĕ gơtùi rơwah tus nhơl sền tiah lòt nhơl Tơnao dà Tà Đùng mờ dà sàng niam, trồ tiah mrềt. Tàm ală gơl gùng lòt nhơl do, cau năc kung gơtùi ƀuơn ngan sền ală bơta niam chài bơh mpồl bơtiàn kòn cau kis bơh yal tàm do dê bè kòn cau Mnông, Rơđê, Mạ…