Bơh bồ nam tus tŭ do, gùt càr Gia Lai gơlik geh 9 dơ̆ bŭ dà, lơh 13 nă kơnòm dềt chơt, uă ngan là tàm ală tiah kal ke, tiah jơi bơtiàn dồ êt nă cau. Tỉñ đoàn càr Gia Lai pà git, pah nam, Đoàn Ơruh pơnu kung gam pờ ală ơdŭ bơto re dà ờ sa priă ai kơnòm dềt in.

Tềng đap bơta kơnòm dềt tàm ală tiah kal ke chơt bŭ dà ngai sơlơ gơguh uă, nam do, Tỉñ đoàn càr rơp lam lơh tus ală tiah sar lơgar ngài, lài ngan là ală kwang bàng đoàn tàm kâp hơ đơm nàng ală kơnòm bơsram in geh bơsram re dà. Ồng Phạm Trần Anh, Phó Kwang atbồ Sở Lao động, Thương ƀiñ mờ Xã hội càr Gia Lai đơs là, nàng rơcang sơndră bŭ dà tàm kơnòm dềt kờñ ngan geh bơta pơgồp bal bơh gùt mpồl bơtiàn dê. Ngan là hìu bơnhă pal sền gròi rlau tai tàm broă sền gàr mờ gròi sền kơnòm dềt, ngan là tơngai ơm rlô bơkang mờr tus.