VOV4.K’ho - Drim òr (07/04), tàm càr Ninh Thuận, bàr càr Lâm Đồng mờ Ninh Thuận neh kĭ hơ bal broă tơnguh bơtàu nhơl chờ tơngai bơh nam 2022 tus 2025, tàm hơ̆ geh broă pơgồp bal ƀòn dờng bơkào Dà Làc mờ tiah dà lềng nhơl chờ Ninh Chữ.

Tàm broă tơnguh bơtàu nhơl chờ bal đah càr Ninh Thuận mờ càr Lâm Đồng tơngai bơh nam 2022 tus 2025, 2 càr do geh cri bơyai, pơgồp bal jơnau đơs bè bơ̆t bơtàu phan nhơl chờ bơh tơl càr dê; lơh gơs mờ tơnguh bơtàu uă bơta phan nhơl chờ, pơgồp bal mờ ală anih tus nàng hòi jà cau năc. Càr Ninh Thuận geh bơta pràn nhơl chờ uă mờ phan nhơl chờ krơi is bơh tiah dà lềng, brê bơnơm mờ bơta chài rơgơi bơh làng bol kòn cau Prum, Rơglai. Gam tàm càr Lâm Đồng den geh bơta pràn bè nhơl chờ krơi is ngan mờ trồ tiah mrềt niam bal mờ bơta ơm rơlô să. Mờ gùng tơrbŏ bal Ninh Thuận mờ càr Lâm Đồng kung là dùl anih nhơl chờ. Bàr càr do gờñ bơ̆t bơtàu dơ̆ nhơl chờ “1 gùng lòt 3 anih tus” là Dà Làc-Phan Rang-Nha Trang, rò năc tàm ƀlàng rơndeh par Liên Khương mờ tơngăc cau năc tàm ƀlàng rơndeh par Cam Ranh, bal mờ ală phan nhơl chờ niam bơnĕ nàng hòi jà mờ tơnjŏ tơngai ơm bơh cau năc nhơl chờ dê.

Cau mblàng Ndong Brawl