Tơnơ̆ 7 nam ngùl kờp bơh ngai sơnđờm mut lơh, gùng lòt tiah đah mat ngai lik, đah mat tơngai mut ƀòn dờng Buôn Ma Thuột, càr Dăk Lăk, pa ngan ngồn geh ală ngai lơh broă jal mhar. Bơta kơn jơ̆ mờ gơnoar atbồ ƀòn dờng sồr cau bơcri lơh in là tàm nggùl nhai tai, broă lơh kờp priă 1 rơbô 200 tơmàn đong do pal geh ai ngui lòt rê, drơng broă lòt rê tàm Dơ̆ lơh chờ Kơphê Buôn Ma Thuột dơ̆ 8 nam 2023.

Gơ kòl dờng ngan bè mpồl ù nàng mut lơh gùng lòt bơh Đinh Tiên Hoàng- Lê Duẩn tus rbàng gan croh dà Ea Tam neh geh bơsong bơh lồi nam lài. Tŭ do ală rơndeh lòt rê tàm gùng neh gơtùi lòt gan rbàng do. Gùng dờng tiah đah mat tơngai lik, đah mat tơngai mut jòng 6,9 kơi sồ ờ mìng tơn lơyah gùng lòt bơh ƀlàng rơndeh par Buôn Ma Thuột rê tus tiah tờm ƀòn dờng dê lơm, mờ gam pờ geh dùl ù tiah bơtàu tơnguh pa rê tus tiah đah Jum dà lơgar dê. Bơh gơl gùng do, gơtùi sền gŏ uă ngan tiah tờm ƀòn dờng Buôn Ma Thuột dê, tàm tơrbŏ bal ù tiah niam bơnĕ tơnau dà Ea Tam (gam geh lơh) mờ bơnah ù tiah “tiah drà lơh sơnơm” tàm rơndap ù tiah bơtàu tơnguh ƀòn dờng tus nam 2023.